‘माथेरान राणी’साठी युरोपीय तंत्रज्ञ

मिनी ट्रेनच्या पुनरुज्जीवनासाठी प्रयत्न

म. टा. खास प्रतिनिधी, मुंबई

मुंबई आणि पुण्यालगत असल्याने पर्यटकांची मोठी पसंती मिळणाऱ्या माथेरानची टॉय ट्रेन म्हणजेच ‘माथेरानची राणी’ ऐन उन्हाळी सुट्ट्यांच्या मोसमात सुरक्षेच्या कारणावरून बंद केल्याने पर्यटकांमध्ये कमालीची नाराजी आहे. माथेरानच्या संस्कृतीचा महत्त्वाचा भाग असणाऱ्या टॉय ट्रेनला पुनरुज्जीवन देण्यासाठी रेल्वेने युरोपियन तंत्रज्ञांना साकडे घातले आहे.

नेरळ-माथेरान मार्गावर टॉय ट्रेनच्या २६ फेऱ्या चालविल्या जातात. मीटरगेजवर चालणाऱ्या या ट्रेनची क्षमता १४४ प्रवाशांची आहे. ही सेवा १०९ वर्षे जुनी असून त्यातील तंत्रज्ञानातही फारसा बदल झालेला नाही. या ​स्थितीत, ही सेवा पूर्ववत होण्यासाठी या सेवेचा संपूर्ण आढावा घेणे आवश्यक आहे.युरोपियन देशात टॉय ट्रेनचे तंत्रज्ञान अद्ययावत आहे. त्यामुळे माथेरानच्या राणीला पुन्हा रुळावर आणण्यासाठी तेथील तज्ज्ञांनाच पाचारण करण्याचा रेल्वेचा विचार आहे.

नफ्यातोट्याचे गणित नको

टॉय ट्रेनमुळे रेल्वेचे दरवर्षी सुमारे २० कोटी रुपयांचे नुकसान होत असल्याचे सांगितले जाते. पण गेल्या दोन वर्षांत अनुक्रमे ४ लाख ५७ हजार आणि ४ लाख ३९ हजार प्रवाशांनी या मिनी ट्रेनचा आनंद लुटला आहे. गतवर्षीच्या तुलनेत महसूलही २७ लाखांनी वाढला आहे. ही रेल्वे आवश्यक असून त्यासाठी रेल्वेने नफ्या-तोट्याचा आकडा मांडू नये, अशी मागणी माथेरान नगर परिषदेचे विरोधी पक्षनेते मनोज खेडकर यांनी केली आहे.

….रेल्वेमंत्र्यांना साकडे

कर्जत : माथेरानची मिनी ट्रेन पूर्ववत चालू ठेवण्यासाठी खासदार श्रीरंग बारणे यांनी बुधवारी संसदेत प्रश्न उपस्थित केला. तसेच, रेल्वेमंत्री सुरेश प्रभू यांची भेट घेऊन चर्चाही केली. मिनी ट्रेन बंद पडल्यास स्थानिक व्यावसायिकांवर उपासमारीची वेळ येणार आहे, याकडे बारणे यांनी लक्ष वेधले.