वृत्तसेवा, मैनपुरी
समाजवादी पक्षाचे नेते मुलायमसिंह यादव आणि बहुजन समाज पक्षाच्या नेत्या मायावती यांच्यातील २४ वर्षांपूर्वीपासून सुरू असलेले वैर शुक्रवारी संपुष्टात आले. मैनपुरी मतदारसंघात शुक्रवारी या दोन्ही नेत्यांनी एकत्रित सभा घेऊन प्रचार केला.
मुलायमसिंह यादव हे मैनपुरीतून निवडणूक लढवित आहेत. मुलायमसिंह यांनी मायावती यांचे स्वागत केले आणि त्यांचा सन्मान राखण्याची सूचना कार्यकर्त्यांना केली. तसेच मायावती यांचे आभारही मानले.
१९९५मध्ये मायावती व बसपाचे संस्थापक अध्यक्ष काशीराम हे सरकारी विश्रामगृहात नेत्यांची बैठक घेत असताना समाजवादी पक्षाच्या कार्यकर्त्यांनी तेथे हल्ला केला होता. यावेळी मोठा हिंसाचार झाला होता. त्यानंतर या दोन्ही पक्षांमधील संबंध ताणले गेले होते. मायावती यांनी यावेळी या हल्ल्याचा संदर्भ देत 'जनहितासाठी आणि पक्षासाठी अवघड निर्णय घ्यावे लागतात,' असे सांगितले. 'मुलायमसिंह यादव हे सर्व समाजाचे नेते आहेत. विशेषत: मागासवर्गीय समाज त्यांना आपला नेता मानतो. ते मोदींसारखे नकली किंवा बनावट नेते नाहीत,' अशी टीकाही त्यांनी केली.
मोदी लाटेचा पुरावा
नवी दिल्ली : मायावती आणि मुलायमसिंह यादव हे एकत्र आले आहेत. यावरूनच पंतप्रधान नरेंद्र मोदी यांची उत्तर प्रदेशात लाट असल्याचे स्पष्ट होते, असा चिमटा भाजपने काढला आहे. 'मोदी लाटेचा हा पुरावा आहे. हे दोन्ही पक्ष सत्ताहीन आहेत. स्वत:च्या अस्तित्वासाठी ते एकत्र आले आहेत. मुलायमसिंहांना ज्या आपल्या आयुष्यातील सर्वांत मोठा अपमान मानत होत्या, त्या मायावतींना आज अचानक सन्मान वाटू लागला आहे,' अशी टीका पक्षाचे प्रवक्ते शाहनवाझ हुसैन यांनी केली.