क्रॉसिंगवर पूल, सरकते जिने

रेल्वे अपघात रोखण्यासाठी ५८० कोटींचा प्रस्ताव

म. टा. खास प्रतिनिधी, मुंबई

मुंबईतील लोकलसेवा रुळांवरील अपघातांमुळे मृत्यूमार्ग बनत आहे. यंदाच्या जानेवारी ते जून दरम्यान रेल्वे अपघातांमधील मृतांची संख्या १४७३ तर जखमींची संख्या १५१८वर पोहोचली आहे. मृत्यूंची ही मालिका रोखण्यासाठी रेल्वे सरसावली असून, सुरक्षित प्रवासासाठी ५८० कोटी रुपयांची योजना आखली असून, त्याचा प्रस्ताव रेल्वे बोर्डाकडे पाठवण्यात आला आहे. मुख्यत: रेल्वेरूळ ओलांडताना होणारे अपघात रोखण्यासाठी क्रॉसिंगवर पूल व सरकते जिने उभारण्याचे उपाय आखण्यात आले आहेत.

अलीकडेच रेल्वे मंत्रालयाच्या उच्चस्तरीय समितीने मध्य व पश्चिम रेल्वेवरील सर्वाधिक अपघात होणाऱ्या ठिकाणांची पाहणी केली. त्यानंतर मरे, ‘परे’च्या वरिष्ठ अधिकाऱ्यांसह मुंबई महापालिका, एमएमआरडीए, सिडको व राज्य सरकारच्या वरिष्ठ अधिकाऱ्यांशीही चर्चा केली. यामध्ये रेल्वेने रूळ ओलांडण्याचे प्रकार रोखण्यासाठीच्या उपायांचे सादरीकरण झाले. १७४ स्थळांवरील अपघातांची संख्या पाहता तिथे सरकते जिने, पादचारी पूल, संरक्षक भिंत, कुंपण उभारण्यासाठी नियोजनाचा निर्णय झाला.