बौद्धांच्या 'रो़ड मॅप'साठी मुंबईत चिंतन बैठक

मटा ऑनलाइन वृत्त । मुंबई

बोधिसत्व डॉ. बाबासाहेब आंबेडकर यांनी केलेल्या धम्म क्रांतीनंतर बौद्ध समाजाच्या आजवर झालेल्या प्रगतीचा आढावा घेतानाच बौद्धांच्या वाटचालीचा रोड मॅप तयार करण्यात येणार आहे. त्यासाठी बुधवारी ३१ मे रोजी दी बुद्धिस्ट इंडियाने मुंबईत एका चिंतन बैठकीचे आयोजन केले असून या चिंतन बैठकीला भारिप बहूजन महासंघाचे नेते अॅड. प्रकाश आंबेडकर मार्गदर्शन करणार आहेत.

बुधवारी ३१ मे रोजी मुंबईतील दादर-नायगाव येथील अंकुर बुद्ध विहाराच्या मैदानावर ही चिंतन बैठक पार पडणार आहे आहे. डॉ बाबासाहेब आंबेडकर यांनी येवला मुक्कामी धर्मांतर करण्याची ऐतिहासिक घोषणा केल्यानंतर लगेचच ३० मे ते ०२ जुन १९३६ या काळात नायगांव येथे मुंबई इलाखा महार परिषद घेतली होती. त्यात त्यांनी केलेले 'मुक्ती कोन पथे' ? हे भाषण प्रसिद्ध असुन त्याला यंदा ८१ वर्षे होत आहेत. त्या निमित्त बौद्ध समाजाच्या पुढील वाटचालीचा कृती आराखडा आखण्यासाठी त्याच ऐतिहासिक भाषणाचे स्थळ निवडण्यात आले आहे.

या कार्यक्रमात उपस्थितांना मार्गदर्शन करण्यासाठी प्रकाश आंबेडकर यांच्यासह सामाजिक कार्यकर्ते वसंत कांबळे, अर्थतज्ज्ञ एस. एस. यादव, ज्येष्ठ पत्रकार राही भिडे, सिने दिग्दर्शक संतोष संखद, बार्टीचे माजी महासंचालक पंजाबराव वानखेडे आदी मान्यवर उपस्थित राहणार असल्याची माहिती दी बुद्धिस्ट इंडियाचे संयोजक सागर झेंडे यांनी दिली. सकाळी १० ते रात्री १० वाजेपर्यंत होणाऱ्या या व्यापक चिंतन बैठकीमध्ये परिसंवाद, कवी संमेलन, सांस्कृतीक गीत-प्रबोधन कार्यक्रम आणि चर्चासत्र पार पडणार असल्याचेही झेंडेही यांनी सांगितले.