तिन्ही मार्गांवर आज मेगाब्लॉक

म. टा. खास प्रतिनिधी, मुंबई

मध्य, पश्चिम, हार्बर रेल्वेवर रविवार, २२ एप्रिलला सकाळी ११ ते दु. ४.१०पर्यंत मेगाब्लॉक असणार आहे. मध्य रेल्वेवर मुलुंड ते माटुंगा धीम्या मार्गावर, हार्बरवर कुर्ला ते वाशी दोन्ही मार्गांवर आणि पश्चिम रेल्वेवर बोरिवली ते गोरेगावपर्यंत धीम्या मार्गावर ब्लॉक चालणार आहे.

मध्य रेल्वेवर कल्याणहून निघणाऱ्या सर्व धीम्या लोकल स. १०.३७ ते दु. ४.०२ पर्यंत मुलुंड ते माटुंगादरम्यान जलद मार्गावर वळवण्यात येतील. त्यांना मुलुंड, भांडुप, विक्रोळी, घाटकोपर, कुर्ला, सायन स्थानकांवर थांबा असून, त्यानंतर त्या पुन्हा माटुंग्यापर्यंत धीम्या मार्गावर चालतील. सीएसएमटीहून सुटणाऱ्या जलद आणि सेमीफास्ट लोकल स. १०.१६ ते दु. २.५४ पर्यंत घाटकोपर, विक्रोळी, भांडुप, मुलुंड आणि दिवा स्थानकांवर थांबतील. कल्याणहून सुटणाऱ्या जलद आणि सेमीफास्ट लोकल स. १०.०४ ते दु. ३.०६ पर्यंत दिवा, मुलुंड, भांडुप, विक्रोळी, घाटकोपर, कुर्ला स्थानकांत थांबतील. ब्लॉक कालावधीत सीएसएमटीच्या दिशेने ये-जा करणाऱ्या लोकल स. ११ ते सायं. ६ पर्यंत किमान १० मिनिटे उशिराने धावतील. लोकल प्रमाणेच मेल/एक्स्प्रेस गाड्यादेखील किमान १५ मिनिटे उशिराने धावतील.

हार्बर मार्गावर कुर्ला ते वाशीपर्यंत दोन्ही मार्गांवर स. ११.१० ते. दु. ४.१०पर्यंत ब्लॉक चालेल. सीएसएमटीहून पनवेल-बेलापूर-वाशीसाठी सुटणाऱ्या लोकल स. १०.३४ ते दु. ३.३९ आणि पनवेल-बेलापूर-वाशीहून सीएसएमटीच्या दिशेने सुटणाऱ्या लोकल स. १०.२१ ते दु. ३.४१ पर्यंत खंडीत राहतील. प्रवाशांच्या सुविधेसाठी सीएसएमटी ते कुर्ला आणि वाशी ते पनवेलपर्यंत विशेष फेऱ्या चालवल्या जातील.

पश्चिम रेल्वेवर स. १०.३५ ते दु. ३.३५पर्यंत बोरिवली ते गोरेगावपर्यंत अप आणि डाऊन मार्गांवर ब्लॉक चालणार आहे. या कालावधीत सर्व धीम्या लोकल जलद मार्गावर चालतील. ब्लॉक कालावधीत बोरिवलीतील १,२,३,४ क्रमांकाच्या प्लॅटफॉर्मवर लोकल थांबणार वा सुटणार नाहीत. राममंदिर स्थानकातही लोकल थांबणार नसून, काही फेऱ्या रद्द होणार आहेत.