तिन्ही मार्गांवर आज रखडपट्टी

म. टा. खास प्रतिनिधी, मुंबई

पश्चिम, मध्य, हार्बर मार्गांवर रविवार, १९ ऑगस्ट रोजी सकाळी ११.२० ते दुपारी ४.२०पर्यंत मेगाब्लॉक घेतला जाणार असून, ओव्हरहेड वायर, सिग्नल यंत्रणा, रुळांच्या दुरुस्तीसाठीचे काम या ब्लॉकदरम्यान केले जाणार आहे.

मध्य रेल्वे: कल्याण ते ठाणेदरम्यान अप धीम्या मार्गावर स. ११.२० ते दु. ४.२० वाजेपर्यंत दुरुस्ती चालेल. या कालावधीत कल्याण ते ठाणेदरम्यान अप धीम्या मार्गावरील सर्व वाहतूक अप जलद मार्गावरून चालविण्यात येईल. स. ११ ते ५ वाजेपर्यंत सीएसएमटीहून ये-जा करणाऱ्या सर्व लोकल स्थानकांमध्ये किमान १० मिनिटे उशिराने पोहोचतील. हार्बरवरील कुर्ला-वाशी अप आणि डाऊन मार्गांवर स. ११.१० ते दु. ४.१० पर्यंत ब्लॉक चालेल. कल्याणहून सुटणाऱ्या सर्व धीम्या आणि अर्धजलद लोकल स. १०.४८ ते दु. ४.१५ पर्यंत कल्याण आणि मुलुंडमध्ये जलद मार्गांवर चालतील. मुलुंडनंतर लोकल पुन्हा धीम्या मार्गावर चालतील. छत्रपती शिवाजी महाराज टर्मिनसवरून (सीएसएमटी) सुटणाऱ्या सर्व जलद लोकल स. १०.०५ ते दु. २.०५ पर्यंत घाटकोपर, विक्रोळी, भांडुप, मुलुंड, दिवा स्थानकांतही थांबतील. कल्याणहून सुटणाऱ्या जलद लोकल स. ११.२३ ते दु. ४.०२ पर्यंत दिवा, मुलुंड, भांडुप, विक्रोळी, घाटकोपर, कुर्ला स्थानकांतही थांबतील तर, अप धीम्या लोकल ठाकुर्ली, कोपर, मुंब्रा, कळवा स्थानकांत थांबणार नाहीत.

हार्बर: सीएसएमटी ते पनवेल, बेलापूर, वाशीपर्यंत स. १०.३४ ते दु. ३.३९ आणि पनवेल, बेलापूर, वाशी ते सीएसएमटीपर्यंत स. १०.२१ ते दु. ३.४१ पर्यंत सेवा खंडीत राहणार आहे. प्रवाशांच्या सुविधेसाठी सीएसएमटी ते कुर्ला आणि वाशी ते पनवेलपर्यंत विशेष लोकल चालवण्यात येतील.

पश्चिम रेल्वे: बोरिवली ते अंधेरी स्थानकांदरम्यान स. १०.३५ ते दु. ३.३५ वाजेपर्यंत अप आणि डाऊन जलद मार्गांवर ब्लॉक असून, या कालावधीत बोरिवली ते अंधेरीमध्ये अप आणि डाऊन जलद वाहतूक अप आणि डाऊन धीम्या मार्गावरून चालेल. तसेच काही फेऱ्या रद्द केल्या जाणार आहेत.