उद्या तिन्ही मार्गांवर मेगाब्लॉक

म. टा. खास प्रतिनिधी, मुंबई

मध्य, हार्बर आणि पश्चिम रेल्वेवर रविवार, ३ जून रोजी सकाळी ११ ते दुपारी ४ वाजेपर्यंत मेगाब्लॉक घेतला जाणार आहे. सिग्नल यंत्रणा, ओव्हरहेड वायर, रुळांच्या देखभाल दुरुस्तीसाठी हा ब्लॉक घेतला जाणार आहे.

माटुंगा ते ठाणे डाऊन धीम्या मार्गावर स. ११.२० ते दु. ४.२० पर्यंत ब्लॉक घेतला जाणार आहे. या ब्लॉकमध्ये डाऊन धीम्या मार्गावरील वाहतूक डाऊन जलद मार्गावर चालवण्यात येईल. या कालावधीत विद्याविहार, कांजूरमार्ग, नाहूर स्थानकांवर गाड्या थांबणार नाहीत.

हार्बर मार्गावर सीएसएमटी-चुनाभट्टी-वांद्रेदरम्यान अप-डाऊन मार्गावर स. ११.१० ते दु.४.४०पर्यंत ब्लॉक घेतला जाणार आहे. या कालावधीत प्रवाशांच्या सुविधेसाठी कुर्ला ते पनवेलपर्यंत विशेष लोकल चालवल्या जातील. ट्रान्सहार्बर आणि मध्य रेल्वेवरून हार्बर मार्गावर प्रवास करणाऱ्यांना स. १० ते सायं. ६ पर्यंत प्रवासास मुभा आहे.

माटुंगाहून सुटणाऱ्या सर्व धीम्या लोकल स. १०.५७ ते दु. ४.२० पर्यंत मुलुंडपर्यंत डाऊन जलद मार्गावर वळवण्यात येतील. या लोकल सायन, कुर्ला, घाटकोपर, विक्रोळी, भांडुप, मुलुंड स्थानकांत थांबतील. त्यानंतर त्या पुन्हा मुलुंडहून डाऊन धीम्या मार्गावर चालवल्या जातील. कल्याणहून सुटणाऱ्या सर्व अप जलद मार्गावरील लोकल स. १०.५४ ते दु. ३.०६ पर्यंत दिवा, मुलुंड, भांडुप, विक्रोळी, घाटकोपर, कुर्ला स्थानकांत थांबतील.

सीएसएमटीहून सुटणाऱ्या सर्व डाऊन जलद लोकल स. १०.४८ ते दु. ३.४० पर्यंत घाटकोपर, विक्रोळी, भांडुप, मुलुंड, दिवा स्थानकांवर थांबतील. हार्बर मार्गावर सीएसएमटी ते चुनाभट्टी/वांद्रेपर्यंत अप आणि डाऊन हार्बरवर स. ११ ते दु. ४.४०पर्यंत ब्लॉक चालेल. वडाळाहून पनवेल/बेलापूर/वाशीपर्यंत स. ११.३४ ते दु. ४.४७ वा. आणि पनवेल/बेलापूर/वाशी ते सीएसएमटीपर्यंत स. ९.५३ ते दु. ३.२० पर्यंत सेवा खंडित राहतील.

पश्चिम रेल्वेवर सांताक्रूझ ते गोरेगावपर्यंत स. १०.३५ ते दु. ३.३५पर्यंत दोन्ही मार्गांवर ब्लॉक आहे. या कालावधीत सर्व जलद लोकल सांताक्रूझ ते गोरेगावपर्यंत धीम्या मार्गावर चालतील. ब्लॉकमध्ये काही लोकल रद्द केल्या जाणार आहेत.