मेट्रोची दरवाढ आणखी लांबणीवर

म. टा. खास प्रतिनिधी, मुंबई

मुंबई मेट्रोच्या दरवाढीच्या प्रश्नावरील याचिकांवर हंगामी आदेश देण्यासंदर्भात १२ एप्रिल रोजी सुनावणी घेऊ, असे मुंबई उच्च न्यायालयाने शुक्रवारी स्पष्ट केले. त्यामुळे मेट्रो दरवाढीवरील हंगामी स्थगिती तोपर्यंत कायम राहणार असल्याने मेट्रो प्रवाशांना आणखी काही दिवस दिलासा मिळाला आहे.

एमएमओपीएलने दरनिश्चिती समितीच्या शिफारस अहवालाच्या आधारे १ डिसेंबर, २०१५पासून मेट्रोच्या तिकिटात ५ रुपये तर मासिक पासमध्ये ५० रुपये वाढ करण्याचा निर्णय जाहीर केला होता. मात्र, एमएमआरडीएने समितीच्या अहवालाला आधीच याचिकेद्वारे आव्हान दिलेले असल्याने उच्च न्यायालयाने निर्णयाला हंगामी स्थगिती दिलेली आहे. एमएमआरडीएची याचिका व काँग्रेसचे नेते संजय निरुपम यांचा हस्तक्षेप अर्ज शुक्रवारी सुनावणीस आला तेव्हा न्या. विद्यासागर कानडे यांच्या नेतृत्वाखालील खंडपीठाने हंगामी आदेशासंदर्भात १२ एप्रिल रोजी सुनावणी घेऊ, असे स्पष्ट केले. तसेच दरवाढीला यापूर्वी न्यायालयाने दिलेली हंगामी स्थगिती तोपर्यंत कायम ठेवली.