लोअर परळमधील म्हाडाचं घर २ कोटीला

मटा ऑनलाइन वृत्त । मुंबई

सर्वसामान्य मुंबईकरांचं घराचं स्वप्नं साकार करण्यासाठी प्रसिद्ध असलेल्या म्हाडाची जाहिरात प्रसिद्ध झाली खरी परंतु लोअर परळमधील एका घराची किंमत तब्बल दीड ते दोन कोटी रुपये इतकी आहे. त्यामुळं मुंबईत घराचं स्वप्नं पाहणाऱ्या मुंबईकरांचा अपेक्षाभंग होण्याची शक्यता आहे.

म्हाडाच्या ८१९ घरांसाठी जाहिरात प्रसिद्ध झाली आहे. यापैकी २०४ घरांची किंमत तब्बल दीड ते दोन कोटींच्या आसपास आहे. म्हाडाच्या जाहिरातीनुसार, लोअर परळमधील उच्च उत्पन्न घटातील दोन घराची किंमत प्रत्येकी दोन कोटीच्या जवळपास आहे. ४४.२१ चौरस मीटर असलेल्या एका घराची किंमत तब्बल १ कोटी ९५ लाख ६७ हजार १०३ रुपये इतकी आहे. तर लोअर परळमधील ३३.८२ चौरस मीटर घरासाठी १ कोटी ४२ लाख ९६ हजार ५१७ रुपये इतकी आहे. उच्च उत्पन्न गटात दीड कोटी रुपये किंमत असलेली ३४ घरे लोअर परळमध्येच आहेत. या घरांसाठी १६ सप्टेंबरपासून ऑनलाइन अर्ज करता येऊ शकणार असून १० नोव्हेंबरला लॉटरी निघणार आहे.

आमदारांना राखीव घरं

महिन्याला दीड लाखांच्यावर पगार घेणाऱ्या तसेच भत्ता, रेल्वे, एसटी, रुग्णालयात सवलत मिळणाऱ्या आणि मुंबईत आमदार निवास असलेल्या आमदारांना म्हाडानं अल्प गटात राखीव घरं ठेवली आहेत. अल्प उत्पन्न गटात चार घरं राखीव ठेवण्यात आली असून कन्नमवार नगरमध्ये ३ तर चारकोप कांदीवली १ घर आहे. दोन्ही घरांची प्रत्येकी किंमत ३५ लाख रुपये इतकी आहे. मध्य उत्पन्न गटात ५ घरं राखीव ठेवण्यात आली आहेत. गोरेगावच्या सिद्धार्थनगरमध्ये २ (प्रत्येकी ३५ लाख), उन्नतनगर, गोरेगावमध्ये १ (४१ लाख), चारकोप कांदिवली १ (४२ लाख), चारकोप कांदिवली (३७ लाख). उच्च उत्पन्न गटात ७ घरं राखीव असून लोअर परळ १ (१ कोटी ४३ लाख), तुंगा पवई ४ (प्रत्येकी १ कोटी ४० लाख), चारकोप कांदिवली १ (७३ लाख), शिंपोली कांदिवली १, (७५ लाख) घरं आमदारांसाठी राखीव ठेवण्यात आली आहेत.