म्हाडा लॉटरीत हजारोंची निराशा
म्हाडाकडील गृहसाठा रोडावल्याने मुंबईकरासाठी पुढील घरांच्या सोडतीपुढे नवीन प्रश्नचिन्ह उभे राहिले आहे. रविवारी म्हाडाच्या २१७ घरासाठी काढण्यात आलेल्या सोडतीत सहभागी झालेल्या हजारो मुंबईकरांना सोडत न लागल्याने निराशेचा सामना करावा लागला आहे.
महाराष्ट्र टाइम्स 3 Jun 2019, 5:54 am
घरांच्या संख्येत वाढ करण्याचे म्हाडापुढे आव्हान
म. टा. खास प्रतिनिधी, मुंबई
म्हाडाकडील गृहसाठा रोडावल्याने मुंबईकरासाठी पुढील घरांच्या सोडतीपुढे नवीन प्रश्नचिन्ह उभे राहिले आहे. रविवारी म्हाडाच्या २१७ घरासाठी काढण्यात आलेल्या सोडतीत सहभागी झालेल्या हजारो मुंबईकरांना सोडत न लागल्याने निराशेचा सामना करावा लागला आहे. म्हाडाच्या वांद्रे येथील मुख्यालयात पार पडलेल्या सोडतीने मुंबईतील घरांचे स्वप्न पुन्हा ऐरणीवर आले आहे. त्यामुळे येत्या विधानसभा निवडणुकीपूर्वी म्हाडाकडून किती घरांची सोडत येईल, याकडे मुंबईकरांचे लक्ष लागले आहे.
म्हाडा प्राधिकरणाकडून राज्यभरातील विविध मंडळात सुमारे ७ हजार घरांची सोडत निघाली आहेत. पण त्यात मुंबईत सर्वात कमी घरांची उपलब्धता आहे. नुकत्याच पार पडलेल्या लोकसभा निवडणुकीपूर्वी जाहीर केलेली २१७ घरांची सोडत आचारसंहिता बंधनामुळे रविवारी काढण्यात आली. म्हाडाच्या वांद्रे येथील मुख्यालयातील मैदानात सोडतीचा कार्यक्रम झाला. या सोहळ्यास म्हाडाचे अध्यक्ष उदय सामंत, भाजप आमदार अॅड. आशीष शेलार, म्हाडाचे सभापती मधु चव्हाण, विनोद घोसाळकर, बाळासाहेब पाटील, म्हाडाचे मुख्य कार्यकारी अधिकारी-उपाध्यक्ष मिलिंद म्हैसकर आदी उपस्थित होते.
रविवारी पार पडलेल्या सोडतीत गेली अनेक वर्षे घरांच्या प्रतीक्षेत असलेल्या गणेश खैरनार यांना घर लागले. म्हाडाचे कर्मचारी असलेले खैरनार हे गेली कित्येक वर्षे सोडतीत भाग घेत आहेत. यावर्षी त्यांनी सर्वसाधारण गटात अर्ज भरला होता. ते सध्या कुर्ला येथे भाड्याच्या घरात राहत असून त्यांचे कुटुंब नाशिकमध्ये राहते. १९९७ पासून म्हाडाच्या सेवेत असलेल्या खैरनार यांनी हक्काचे घर मिळणार असल्याचा आनंद अवर्णनीय असल्याची प्रतिक्रिया व्यक्त केली. म्हाडाचेच अन्य एक कर्मचारी प्रशांत गायकवाड यांचाही सोडतीत क्रमांक लागला आहे. मुंबईत घर होण्याचे स्वप्न सोडतीने पूर्ण झाले. गेली पाच वर्षे अर्ज भरले होते, त्यास आता यश आल्याची प्रतिक्रिया त्यांनी दिली.
यापूर्वी म्हाडाच्या सोडतीतील घरांची संख्या शेकडोंमध्ये असल्याने त्यासाठी अभूतपूर्व उत्सुकता निर्माण होत असे. मात्र आता ऑनलाइन प्रक्षेपणामुळे प्रत्यक्ष सोडतीकडे फिरकणाऱ्यांची संख्याही कमी झाली आहे. तरीही निकाल जाहीर झाल्यानंतर लागणाऱ्या यादीत वा प्रतीक्षायादी तरी नाव झळकेल या अपेक्षेत बरेच अर्जदार यादी तपासत असल्याचे चित्र रविवारी म्हाडा मुख्यालयात दिसत होते.
अर्ज भरत राहणार
अंधेरीत भाड्याच्या घरात राहणाऱ्या सचिन आगवणे (३२) यांनी आतापर्यंत बऱ्याचवेळा म्हाडाच्या सोडतीत अर्ज दाखल केला आहे. आताच्या सोडतीतही त्यांना घर लागले नाही. तरीही प्रयत्न करत राहणार असून सर्वसामान्यांसाठी म्हाडाची सोडत हा मोठा आधार असल्याचे मत त्यांनी मांडले.
तफावतीबद्दलही चिंता
या सोडतीसाठी ६६ हजारांवर अर्ज आल्याने मागणी आणि पुरवठ्यामधील प्रचंड तफावतीबद्दलही चिंता व्यक्त केली जात आहे. बरेच अर्जदार कधीतरी सोडतीत आपला क्रमांक येईल, या अपेक्षेत अर्ज भरत असतात. त्यात गोरेगावमधील अभिजीत कुलकर्णी, विरारमधील अभिषेक आणि विवेक सिन्हा यांच्यासारख्या हजारो अर्जदारांचा समावेश आहे. असे हजारो अर्जदार पुढील सोडतीच्या प्रतीक्षेत आहेत. मात्र घरांची उपलब्धतता आणि प्रत्यक्ष पुरवठ्याचे गणित पूर्वीपासूनच कोलमडल्याने अर्जदारांची संख्या प्रचंड वाढत आहे. नेमकी हीच त्रुटी सोहळ्यास उपस्थित असलेल्या राजकीय नेत्यांनीही अधोरेखित केली. उदय सामंत, आशीष शेलार, मधु चव्हाण यांनीही मनोगतात ही तफावत अधोरेखित केली.
म. टा. खास प्रतिनिधी, मुंबई
म्हाडाकडील गृहसाठा रोडावल्याने मुंबईकरासाठी पुढील घरांच्या सोडतीपुढे नवीन प्रश्नचिन्ह उभे राहिले आहे. रविवारी म्हाडाच्या २१७ घरासाठी काढण्यात आलेल्या सोडतीत सहभागी झालेल्या हजारो मुंबईकरांना सोडत न लागल्याने निराशेचा सामना करावा लागला आहे. म्हाडाच्या वांद्रे येथील मुख्यालयात पार पडलेल्या सोडतीने मुंबईतील घरांचे स्वप्न पुन्हा ऐरणीवर आले आहे. त्यामुळे येत्या विधानसभा निवडणुकीपूर्वी म्हाडाकडून किती घरांची सोडत येईल, याकडे मुंबईकरांचे लक्ष लागले आहे.
म्हाडा प्राधिकरणाकडून राज्यभरातील विविध मंडळात सुमारे ७ हजार घरांची सोडत निघाली आहेत. पण त्यात मुंबईत सर्वात कमी घरांची उपलब्धता आहे. नुकत्याच पार पडलेल्या लोकसभा निवडणुकीपूर्वी जाहीर केलेली २१७ घरांची सोडत आचारसंहिता बंधनामुळे रविवारी काढण्यात आली. म्हाडाच्या वांद्रे येथील मुख्यालयातील मैदानात सोडतीचा कार्यक्रम झाला. या सोहळ्यास म्हाडाचे अध्यक्ष उदय सामंत, भाजप आमदार अॅड. आशीष शेलार, म्हाडाचे सभापती मधु चव्हाण, विनोद घोसाळकर, बाळासाहेब पाटील, म्हाडाचे मुख्य कार्यकारी अधिकारी-उपाध्यक्ष मिलिंद म्हैसकर आदी उपस्थित होते.
रविवारी पार पडलेल्या सोडतीत गेली अनेक वर्षे घरांच्या प्रतीक्षेत असलेल्या गणेश खैरनार यांना घर लागले. म्हाडाचे कर्मचारी असलेले खैरनार हे गेली कित्येक वर्षे सोडतीत भाग घेत आहेत. यावर्षी त्यांनी सर्वसाधारण गटात अर्ज भरला होता. ते सध्या कुर्ला येथे भाड्याच्या घरात राहत असून त्यांचे कुटुंब नाशिकमध्ये राहते. १९९७ पासून म्हाडाच्या सेवेत असलेल्या खैरनार यांनी हक्काचे घर मिळणार असल्याचा आनंद अवर्णनीय असल्याची प्रतिक्रिया व्यक्त केली. म्हाडाचेच अन्य एक कर्मचारी प्रशांत गायकवाड यांचाही सोडतीत क्रमांक लागला आहे. मुंबईत घर होण्याचे स्वप्न सोडतीने पूर्ण झाले. गेली पाच वर्षे अर्ज भरले होते, त्यास आता यश आल्याची प्रतिक्रिया त्यांनी दिली.
यापूर्वी म्हाडाच्या सोडतीतील घरांची संख्या शेकडोंमध्ये असल्याने त्यासाठी अभूतपूर्व उत्सुकता निर्माण होत असे. मात्र आता ऑनलाइन प्रक्षेपणामुळे प्रत्यक्ष सोडतीकडे फिरकणाऱ्यांची संख्याही कमी झाली आहे. तरीही निकाल जाहीर झाल्यानंतर लागणाऱ्या यादीत वा प्रतीक्षायादी तरी नाव झळकेल या अपेक्षेत बरेच अर्जदार यादी तपासत असल्याचे चित्र रविवारी म्हाडा मुख्यालयात दिसत होते.
अर्ज भरत राहणार
अंधेरीत भाड्याच्या घरात राहणाऱ्या सचिन आगवणे (३२) यांनी आतापर्यंत बऱ्याचवेळा म्हाडाच्या सोडतीत अर्ज दाखल केला आहे. आताच्या सोडतीतही त्यांना घर लागले नाही. तरीही प्रयत्न करत राहणार असून सर्वसामान्यांसाठी म्हाडाची सोडत हा मोठा आधार असल्याचे मत त्यांनी मांडले.
तफावतीबद्दलही चिंता
या सोडतीसाठी ६६ हजारांवर अर्ज आल्याने मागणी आणि पुरवठ्यामधील प्रचंड तफावतीबद्दलही चिंता व्यक्त केली जात आहे. बरेच अर्जदार कधीतरी सोडतीत आपला क्रमांक येईल, या अपेक्षेत अर्ज भरत असतात. त्यात गोरेगावमधील अभिजीत कुलकर्णी, विरारमधील अभिषेक आणि विवेक सिन्हा यांच्यासारख्या हजारो अर्जदारांचा समावेश आहे. असे हजारो अर्जदार पुढील सोडतीच्या प्रतीक्षेत आहेत. मात्र घरांची उपलब्धतता आणि प्रत्यक्ष पुरवठ्याचे गणित पूर्वीपासूनच कोलमडल्याने अर्जदारांची संख्या प्रचंड वाढत आहे. नेमकी हीच त्रुटी सोहळ्यास उपस्थित असलेल्या राजकीय नेत्यांनीही अधोरेखित केली. उदय सामंत, आशीष शेलार, मधु चव्हाण यांनीही मनोगतात ही तफावत अधोरेखित केली.