माथेरानची मिनी ट्रेन होणार आठ डब्यांची

लवकरच होणार चाचणी

म. टा खास प्रतिनिधी, मुंबई

माथेरानला जाणाऱ्या पर्यटकांची लाडकी मिनी ट्रेन लवकरच आठ डब्याची करण्यात येणार आहे. सध्या ही ट्रेन सहा डब्यांची चालवली जाते. अमन लॉज ते माथेरानपर्यंत चालणाऱ्या या गाडीला पर्यटकांची म‌िळणारी पसंती पाहून, हा न‌िर्णय घेण्यात आला आहे.

माथेरानमध्ये शनिवार आणि रविवारी पर्यटकांची प्रचंड गर्दी असते. अशावेळी सहा डब्यांची गाडी अपुरी पडते. त्यामुळे या डब्यांची संख्या वाढविण्याची मागणी पर्यटकांप्रमाणेच स्थानिकांनीही केली होती. गेल्या दीड वर्षांपासून बंद असलेली ही मिनी ट्रेन मध्य रेल्वेने नुकतीच सुरू केली आहे. तसेच त‌िला किमान दोन वाढ‌ीव डबे जोडण्यात यावे, यासाठी नियोजन केले जात आहे. त्यासाठी चाचणी घेण्यात येणार आहे. दरम्यान, ही चाचणी घेताना प्रवासी आणि प्रवासी सेवांवर कोणताही परिणाम होऊ न देण्याची दक्षता घेतली जाईल, असे मध्य रेल्वेचे विभागीय रेल्वे व्यवस्थापक एस. के. जैन यांनी सांगितले.