१४ वर्षीय बलात्कार पीडित, आता गर्भपात करणे व्यवहार्य ठरेल का?

म. टा. विशेष प्रतिनिधी, मुंबई : विरारमध्ये चुलत भावानेच बलात्कार केल्याने गर्भवती राहिलेल्या अवघ्या १४ वर्षांच्या मुलीचा वैद्यकीयदृष्ट्या गर्भपात करण्यास परवानगी द्यायची की नाही, हा विषय सध्या मुंबई उच्च न्यायालयासमोर आहे. त्यामुळे या मुलीचे वय व तिची प्रकृती लक्षात घेता गर्भपात करणे व्यवहार्य ठरेल की नाही, याबाबत तिची सखोल वैद्यकीय तपासणी करून अहवाल देण्याचा आदेश न्यायालयाने जे.जे. रुग्णालयाच्या तज्ज्ञ डॉक्टरांच्या समितीला दिला आहे.

विशिष्ट प्रकारांत वैद्यकीयदृष्ट्या गर्भपात करण्यासाठी न्यायालयाची परवानगी घेणे आवश्यक असते. पीडित मुलगी अल्पवयीन असल्याने गर्भपाताला परवानगी द्यावी, यासाठी तिच्या वडिलांनी उच्च न्यायालयात याचिका केली आहे. उन्हाळी सुट्टीकालीन न्यायालयाचे न्या. नितीन सांब्रे व न्या. अनिल पानसरे यांच्या खंडपीठासमोर याविषयी नुकतीच तातडीची सुनावणी झाली. त्यावेळी 'पीडित मुलीचे वय साडेचौदा वर्षे असून तिची गर्भधारणा सध्या १३ आठवड्यांची आहे. मुलीची २ मे रोजी जे.जे. रुग्णालयात वैद्यकीय तपासणी करण्यात आली होती', असे सरकारी वकील माधवी म्हात्रे यांनी वैद्यकीय अहवालाच्या आधारे न्यायालयाला सांगितले. त्यानंतर 'मुलीचे वय व तिची प्रकृती लक्षात घेऊन वैद्यकीयदृष्ट्या गर्भपात करणे व्यवहार्य ठरेल का, याबाबत मुलीची सखोल वैद्यकीय तपासणी करून अहवाल देण्याबाबत जे.जे. रुग्णालयाच्या अधिष्ठात्यांनी तज्ज्ञ डॉक्टरांची समिती स्थापन करावी. या समितीने आपला अहवाल सोमवार, २३ मे रोजी न्यायालयात सादर करावा', असा आदेश देऊन खंडपीठाने तोपर्यंत सुनावणी तहकूब केली.