माहीममध्ये मिसळ महोत्सव

म. टा. प्रतिनिधी, मुंबई

नगरची मारोतराव मिसळ, नाशिकची माऊली मिसळ, कोल्हापूरची अभिची मिसळ, संगमेश्वरची मुळ्येंची मिसळ, ठाण्यातील मामलेदारांची मिसळ अशा महाराष्ट्रातल्या विविध भागातील खमंग-तर्रीदार मिसळीची चव मुंबईकरांना एकाच ठिकाणी अनुभवता यावी, यासाठी मनसेने २६ जानेवारीपासून तीन दिवस माहीममध्ये मिसळ महोत्सव आयोजित केला आहे. मनसे अध्यक्ष राज ठाकरे यांच्या हस्ते शुक्रवारी संध्याकाळी पाच वाजता या महोत्सवाचे उद्घाटन होईल.

मिसळ हा महाराष्ट्राच्या खाद्यसंस्कृतीचा अविभाज्य घटक आहे. राज्यातील प्रत्येक जिल्ह्यातील मिसळीची चव वेगळी आहे. कोल्हापूरची लालभडक झणझणीत मिसळ, नाशिकची काळ्या मसाल्याची मिसळ, पुण्याची बटाटा घातलेली मिसळ अशा प्रत्येक भागाची वेगळी खासियत आहेत. मुंबईकरांना राज्यातील वेगवेगळ्या भागातील मिसळीची चव चाखता यावी, या हेतूने २६, २७ व २८ जानेवारी रोजी माहीम येथील मोगल लेनमध्ये हा महोत्सव आयोजित केल्याची माहिती मनसेचे नेते नितीन सरदेसाई यांनी दिली. मनसेच्या वतीने यापूर्वी अनेक वर्षे माहीममध्ये कोळी महोत्सव आयोजित करण्यात येत होता. यंदा प्रथमच मिसळ महोत्सव आयोजित केला आहे. शनिवार व रविवार या दोन्ही दिवशी सकाळी दहा ते रात्री दहा यावेळेत हा महोत्सव सुरू राहिल.