आमदारांची फुटबॉल मॅच; CM समालोचक!

मटा ऑनलाइन वृत्त । मुंबई

महाराष्ट्र विधानभवनाच्या आवारात आज अध्यक्ष इलेव्हन विरुद्ध सभापती इलेव्हन असा आमदारांच्या दोन संघांमध्ये फुटबॉल सामना रंगला. नेहमी विधीमंडळात महाराष्ट्रातील जनतेचे प्रतिनिधित्व करीत त्यांचे प्रश्न व समस्या मांडणारे आमदार आज मात्र फुटबॉल खेळण्यात दंग झाले होते. वैशिष्ट्य म्हणजे मुख्यमंत्री देवेंद्र फडणवीस यांनी सामन्याचे समालोचन केले.

जागतिक फुटबॉल महासंघाची (फिफा) १७ वर्षांखालील विश्वचषक स्पर्धा ऑक्टोबर महिन्यात भारतामध्ये होत आहे. केवळ भारतामध्येच नव्हे, तर संपूर्ण भारतीय उपखंडामध्ये होणारी ही पहिलीची फिफाची विश्वचषक स्पर्धा आहे. या ऐतिहासिक स्पर्धेच्या निमित्ताने संपूर्ण देशात क्रीडा-क्रांती रुजविण्याचे आवाहन पंतप्रधान नरेंद्र मोदी यांनी केले आहे. याच निमित्ताने क्रिडा मंत्री विनोद तावडे यांच्या संकल्पनेतून हा सामना आयोजित करण्यात आला होता.



विधीमंडळाच्या परिसरातील वाहनतळाच्या मोकळ्या जागेत अध्यक्ष इलेव्हन विरुध्द सभापती इलेव्हन असा सामना रंगला. सर्वपक्षीय आमदार या सामन्यामध्ये सहभागी झाले होते. मुख्यमंत्री देवेंद्र फडणवीस, विधान परिषदेचे सभापती रामराजे निंबाळकर, विधानसभा अध्यक्ष हरिभाऊ बागडे, उपसभापती माणिकराव ठाकरे, विरोधी पक्ष नेते राधाकृष्ण विखे पाटील, विधानपरिषदेचे विरोधी पक्ष नेते धनंजय मुंडे यांच्या प्रमुख उपस्थितीत टॉस उडविण्यात आला. मुख्यमंत्र्यांनी फुटबॉलला किक मारुन सामन्याचा शुभारंभ केला.



अध्यक्षीय इलेव्हन आणि सभापती इलेव्हन संघात आशिष शेलार, राज पुरोहित, नरेंद्र पवार, जयकुमार गोरे, संग्राम धोपटे, संतोष दानवे, इम्तियाज जलील, संभाजी पाटील निलंगेकर, नरेंद्र पाटील, निरंजन डावखरे, योगेश टिळेकर, उन्मेष पाटील, प्रशांत ठाकूर, परिणय फुके, राहुल कुल, सागर मेघे, महेश लांडगे, जयकुमार रावल, जयंत जाधव, सुनील शिंदे, राजू तोडसाम, अतुल सावे, अमित घोडे, संजय धोटे आदी आमदार सहभागी झाले होते.