'केंद्रीय यंत्रणांचा आमदारांवर दबाव', नाना पटोले यांचा आरोप

म. टा. विशेष प्रतिनिधी, मुंबई ः विधान परिषद निवडणुकीच्या पार्श्वभूमीवर सर्वच राजकीय पक्ष मतांची बेगमी करीत असतानाच, मतदार असलेल्या आमदारांवर मतांसाठी केंद्रीय तपास यंत्रणेचा वापर करून दबाव टाकला जात असल्याचा आरोप काँग्रेसचे प्रदेशाध्यक्ष नाना पटोले यांनी शनिवारी केला. यासंबंधीचे रेकॉर्डिंग आपल्याकडे असल्याचा दावाही त्यांनी यावेळी केला.

मुंबईत पत्रकारांशी बोलताना पटोले यांनी हा आरोप केला. यावेळी त्यांनी विधान परिषद निवडणुकांपासून ते अग्निपथ योजनेपर्यंत अनेक मुद्द्यांवरून केंद्र सरकारवर टीका केली. 'विधान परिषदेवर निवडून येण्यासाठी भाजपला २२ मते लागणार आहेत. ती जमवणे त्यांना शक्य नसल्याने आता तपास यंत्रणांचा दुरुपयोग केला जात आहे. मात्र तरीही ते हरणारच आहेत. केंद्रीय तपास यंत्रणा आमदारांना संपर्क साधत आहेत. त्याचे रेकॉर्डिंग आमच्याकडे आहे', असे पटोले म्हणाले.

'विधान परिषद निवडणुकीतील सहा जागा महाविकास आघाडीच जिंकणार आहे. आम्ही सर्व आमदारांच्या संपर्कात आहोत. राज्यसभा निवडणुकीमध्ये काही गैरसमज झाले होते. पण आता अपक्ष आमदार आणि संजय राऊत यांच्यातील वाद संपला आहे,' असे पटोले यांनी सांगितले. 'मागील दोन वर्षांत स्वीस बँकेत २१२ टक्के पैसे वाढले आहेत. मात्र काँग्रेसला विनाकारण बदनाम केले गेले. आता सत्ता आणि पैसे कोणाकडे आहेत ते सगळ्यांना माहिती आहे. भाजपचा काळा चेहरा समोर आला आहे. अग्निपथवरून तरुण सरकारच्या विरोधात रस्त्यावर उतरले आहेत. ही भाजपच्या पराभवाची सुरुवात आहे', असेही ते म्हणाले.