आनंदनगर-साकेत उन्नत मार्ग केव्हा?; एमएमआरडीएकडून तिसऱ्यांदा निविदा

मुंबई : पूर्व द्रुतगती महामार्गावर आनंदनगर ते साकेत दरम्यान उभारल्या जाणाऱ्या उन्नत मार्गासाठी सल्लागार नियुक्तीसाठी मुंबई महानगर प्रदेश विकास प्राधिकरणाने (एमएमआरडीए) तिसऱ्यांदा निविदा मागविली आहे. आधीच्या निविदांना प्रतिसाद न मिळाल्याने एमएमआरडीएला तिसऱ्यांदा निविदा काढावी लागली आहे.

मुंबई-आग्रा महामार्गावरून मुंबईकडे ये-जा करणाऱ्या वाहनांमुळे ठाण्याच्या अंतर्गत भागातून प्रवास करावा लागतो. मुंबईतून नाशिककडे जाणाऱ्या वाहनांना शहराच्या अंतर्गत भागातून प्रवास करावा लागू नये याकरिता पूर्व द्रुतगती महामार्गावर आनंदनगर ते साकेत असा ६.३० किलोमीटर लांबीची उन्नत मार्गिका उभारली जाणार आहे. या उन्नत मार्गिकेचा सविस्तर प्रकल्प अहवाल आणि प्रकल्पाच्या कामासाठी सल्लागाराची मुंबई महानगर प्रदेश विकास प्राधिकरणाकडून (एमएमआरडीए) नियुक्ती करण्यात येणार आहे. सल्लागाराला डीपीआर अंतिम करून प्रकल्पाच्या कामासाठी तीन महिन्यात निविदा प्रक्रीया राबवावी लागणार आहे.

सद्यस्थितीत मुंबईतून पूर्व द्रुतगती महामार्गावरून ठाण्यात येणारी वाहने आनंदनगर येथून शहरातील अंतर्गत रस्त्याने पुढे नाशिकच्या दिशेने जातात. तसेच घोडबंदर रस्त्याकडे जाणारी वाहनेही पूर्व द्रुतगती मार्गावरून प्रवास करतात. या रस्त्यावर आधीच शहरातील वाहनांची गर्दी असते. त्यात बाहेरून आलेल्या वाहनांनी गर्दीत भर पडते. परिणामी ठाण्यातील अंतर्गत भागात कायमच कोंडी असल्याची स्थिती असते. त्यातच पुढील वर्षी मुंबई ते नागपूर समृद्धी महामार्गाचे काम पूर्णत्वास जाऊन हा रस्ता वाहतुकीसाठी खुला केला जाणार आहे. हा रस्ता ठाण्याच्या वेशीवर येणार आहे. त्यामुळे मुंबईकडे जाणाऱ्या वाहनांना ठाण्याच्या अंतर्गत भागातूनच पुढे प्रवास करावा लागणार आहे. तसेच गायमुख ते साकेत सागरी किनारा मार्गाचे कामही सुरू होणार आहे. हा रस्ता पूर्ण झाल्यावर गुजरातवरून येणारी वाहनेही ठाण्यात दाखल होणार आहेत. त्यामुळे सध्याच्या पूर्व द्रुतगती महामार्गावरील वाहतुकीवर ताण येणार आहे.

१६०० कोटी रुपयांचा खर्च अपेक्षित

ठाणे शहरातील कोंडी टाळून रस्ते सुसह्य करण्यासाठी आनंदनगर ते साकेत असा दोन्ही बाजूंच्या वाहतुकीसाठी प्रत्येकी तीन मार्गिकेचा उन्नत रस्ता उभारण्यात येणार आहे. त्यासाठी सुमारे १६०० कोटी रुपयांचा खर्च अपेक्षित आहे.