'आणीबाणी'वरून राज यांचा मोदींवर निशाणा!

मुंबई :

आणीबाणीवरून पंतप्रधान नरेंद्र मोदी यांनी काँग्रेस आणि इंदिरा गांधीवर निशाणा साधला असताना मनसे अध्यक्ष राज ठाकरे यांनी आपल्या व्यंगचित्रातून मोदींना लक्ष्य केले आहे. 'लोका सांगे...' असे शिर्षक या व्यंगचित्राला देण्यात आले असून मोदी सरकारच्या काळातही देशात आणीबाणीसारखीच स्थिती निर्माण झाली आहे, अशी तोफ राज यांनी या माध्यमातून डागली आहे.

माजी पंतप्रधान इंदिरा गांधी यांनी देशावर लादलेल्या आणीबाणीच्या काळ्याकुट्ट इतिहासाला ४३ वर्षे पूर्ण झाली आहेत. हे निमित्त साधून पंतप्रधान नरेंद्र मोदी व भाजपचे अन्य मंत्री व नेत्यांनी इंदिरा गांधी आणि काँग्रेसवर सडकून टीका केली आहे. इंदिरा गांधी या हिटलर वृत्तीच्या होत्या. त्यांनी देशात आणीबाणी लादली. विचार आणि वाणीस्वातंत्र्याच्या मुसक्या आवळल्या. आणीबाणी ही एक भयानक गोष्ट आहे, अशाप्रकारची विधानं भाजपकडून करण्यात आली. त्याचा समाचार घेत राज यांनी आपल्या व्यंगचित्रातून भाजप व मोदी सरकारच्या कारभारावर निशाणा साधला आहे.

इंदिरा गांधींकडे बोट दाखवणारे पंतप्रधान मोदी हेही त्यांच मार्गाने चालले आहेत. रिझर्व्ह बँक, उद्योगपती, वर्तमानपत्रे, टेलिव्हिजन चॅनल्स, निवडणूक आयोग हे सगळेच मोदी सरकारच्या पायाखाली दबले आहेत, असे खोचक व्यंग राज यांनी आपल्या व्यंगचित्रात रेखाटले आहे. मोदी सरकारच्या या कारभाराची भाजपाध्यक्ष अमित शहा टाळ्या वाजवून प्रशंसा करत असल्याचेही चित्र या व्यंगचित्रात पाहायला मिळते. राज यांच्या या व्यंगचित्राने भाजप विरुद्ध राज असा वाद उफाळण्याची चिन्हे आहेत.