Raj Thackeray: राज ठाकरेंनी कुठलाही दंड वगैरे भरलेला नाही; मनसेचा खुलासा

मुंबई: मुंबई-मांडवा प्रवासात मास्क न घातल्यामुळं मनसे अध्यक्ष राज ठाकरे यांना दंड भरावा लागल्याच्या वृत्ताचं मनसेनं खंडन केलं आहे. असं काहीही घडलं नसल्याचं मनसेचे नेते नितीन सरदेसाई यांनी स्पष्ट केलं आहे.

राज ठाकरे हे शुक्रवारी त्यांच्या कुटुंबीयांसोबत रो-रो फेरी बोटीने अलिबागकडे जात होते. त्यावेळी रो-रो बोटीत प्रवाशांनी धुमप्रान करू नये आणि मास्क परिधान करावा, अशी उद्घोषणा केली जात होती. ही बाब राज ठाकरे यांच्या लक्षात आली नसावी. ते बोटीवरच्या मोकळ्या जागेत मास्क न परिधान करताच उभे होते. यावेळी त्यांनी सिगारेटही शिलगावली होती. या चुकीबद्दल त्यांना नियमानुसार एक हजार रुपये दंड भरावा लागला, असं वृत्त प्रसिद्ध झालं होतं. सरदेसाई यांनी हे वृत्त फेटाळलं आहे.

वाचा: ...तर तसं लाल किल्ल्यावरून जाहीर करून टाका; शिवसेनेचे आव्हान

नितीन सरदेसाई यांनी या संदर्भात एक पत्रक प्रसिद्ध केलं आहे. 'मुंबई-मांडवा प्रवासादरम्यान मी स्वत: राज ठाकरे यांच्यासोबत होतो. त्यावेळी अशी कोणतीही घटना घडली नव्हती. या संदर्भातील बातमी चुकीची आहे. केवळ ऐकीव माहितीवर ही बातमी देण्यात आली आहे. अशा बातम्यांमुळं लोकांची दिशाभूल होते. बातमी देण्यापूर्वी संबंधितांनी खातरजमा करायला हवी होती,' असं सरदेसाई यांनी म्हटलं आहे.

वाचा: ज्येष्ठ अभिनेत्री आशालता वाबगावकर यांचं करोनामुळं निधन