म. टा. प्रतिनिधी, मुंबई
देशभरात इंधन दरवाढीचा भडका उडाला असताना महाराष्ट्र नवनिर्माण सेनेने मुंबईकरांना एका दिवसासाठी दिलासा देण्याचा इरादा व्यक्त केला आहे. मनसे अध्यक्ष राज ठाकरे यांच्या वाढदिवसाचे औचित्य साधून येत्या १४ जूनला मनसेतर्फे मुंबईतील ३६ विधानसभा मतदारसंघांतील प्रत्येकी एका पेट्रोलपंपावर दुचाकी वाहनांना प्रति लिटर चार रुपये कमी दराने पेट्रोल दिले जाणार आहे.
मनसेचे संस्थापक राज ठाकरे यांचा वाढदिवस अभिनव पद्धतीने साजरा करण्यात येणार आहे. त्याचाच भाग म्हणून येत्या १४ जून रोजी मुंबईतील ३६ विधानसभा मतदारसंघांतील प्रत्येकी एका पेट्रोलपंपावर ही इंधन दरात सवलत देण्यात येईल, अशी माहिती मनसेचे सरचिटणीस संदीप देशपांडे यांनी पत्रकारांना दिली. बुधवारी पेट्रोलचे दर अवघ्या एक पैशाने स्वस्त झाल्याबद्दल मनसेतर्फे पंतप्रधान नरेंद्र मोदी यांचे हात जोडून आभार मानतो, अशी प्रतिक्रिया देशपांडे यांनी दिली आहे.