आघाडी सरकारविरोधात मनसेचे आज 'हॉर्न वाजवा' आंदोलन

म. टा. विशेष प्रतिनिधी, मुंबई: राज्यातील महाविकास आघाडी सरकारविरोधात मनसे आता रस्त्यावर उतरणार आहे. अडचणीत आलेल्या वाहतूक व्यवसायाच्या मुद्द्यावरून सरकारला जागे करण्यासाठी शुक्रवार, १२ जूनला पक्षातर्फे 'हॉर्न वाजवा' आंदोलन करण्यात येणार आहे.

करोनामुळे आधीच संकट ओढवले आहे. वाहतूक व्यवसाय अडचणीत आला आहे. त्यामुळे या व्यवसायातील सर्वांचा आक्रोश बहिऱ्या राज्य सरकारच्या कानावर जावा, झोपेचे सोंग घेतलेले सरकार खडबडून जाग व्हावे यासाठी हे आंदोलन आहे, अशी माहिती महाराष्ट्र नवनिर्माण वाहतूक सेना अध्यक्ष संजय नाईक यांनी दिली. संध्याकाळी ५ वाजता हे आंदोलन होणार असून, संघटनेच्या वतीने फक्त एक मिनिट हॉर्न वाजवण्यात येणार असल्याचेही त्यांनी सांगितले.