न्यायालयात मॉकड्रिलचा थरार

शॉर्ट सर्किट झाल्यानंतरच्या सुटकेचे प्रात्यक्षिक


म. टा. प्रतिनिधी, मुंबई

सायरन वाजतो आणि दुसऱ्या क्षणी अग्निशमन दलाची गाडी जवानांसह मुंबई उच्च न्यायालयाच्या आवारात शिरते. न्यायालयाच्या पहिल्या मजल्यावरील कक्ष क्र. २३ मध्ये शॉर्ट सर्किट झाले असल्याने सर्वांनी त्वरित खाली यावे, अशी घोषणा ध्वनिवर्धकावरून सुरू होते. पोलिस, कर्मचारीवर्ग, पक्षकार पटापट खाली येतात. शिडीवरून जवान झपाझप वरच्या मजल्यावर जातात आणि तेथून एका जवानाला खांद्यावर घेऊन दुसरा जवान शिडीने खाली येतो. खाली उभे असलेल्यांपैकी काही जणांच्या चेहऱ्यावर उत्सुकता तर काही चेहरे घाबरलेले…! अवघ्या २० मिनिटांत हे सर्व आटोपते. यानंतर हे मॉक ड्रिल असल्याचे जाहीर होते आणि सर्व निश्वास सोडतात.
उच्च न्यायायालयात शॉर्ट सर्किटचा प्रसंग घडला तर लोकांनी तळमजल्यावर यावे आणि अडकलेल्या लोकांची अग्निशमन जवान कशी सुटका करतात याचे प्रात्यक्षिक दाखविणे हा या मॉक ड्रिलमागील उद्देश होता, असे अग्निशमन दलातर्फे सांगण्यात आले. तसेच ठरावीक लोकांना या मॉक ड्रिलसाठी निवडण्यात आले असल्याने त्यांनी तळमजल्यावर विशिष्ट व्यक्तीकडे येऊन रिपोर्टिंग करावे, हासुद्धा उद्देश होता. या मॉक ड्रिलची तयारी म्हणून दुपारी साडेचारनंतर न्यायालयाचे कामकाज संपवून कर्मचाऱ्यांना खास तळमजल्यावर बोलावण्यात आले होते. प्रत्यक्ष जवान ज्या सफाईने शिडीवरून वरच्या मजल्यावर जात होते आणि त्यांच्यापैकी एक जण दुसऱ्या जवानाला खांद्यावर घेऊन त्याच शिडीने भरभर खाली येत होता ते पाहून उपस्थितांचे श्वास रोखले होते. मॉक ड्रिलबद्दल काहींना अगोदरच कल्पना होती तर काही जणांना माहित नसल्याने त्यांचे चेहरे काहीसे चिंताग्रस्त दिसत होते. मॉक ड्रिल संपले आणि सर्वांची पांगापांग झाली.