म. टा. प्रतिनिधी, मुंबई
कलिना येथील हवाईतळावर गुरुवारी दहशतवादी हल्ल्याचे 'मॉक ड्रील' करण्यात आले. शहरी युद्धपद्धती अंतर्गत ही संयुक्त कसरत झाली. त्याचे नेतृत्व मुंबईत तैनात नॅशनल सेक्युरिटी गार्ड्सच्या (एनएसजी) विशेष संमिश्र चमूने केले.
एनएसजी कमांडोच्या तुकड्या अत्याधुनिक उपकरणांनी सज्ज असतात. प्रत्येक कमांडो त्या संबंधित उपकरणात पारंगत असतो. त्यामध्येच इलेक्ट्रॉनिक देखरेखीचाही समावेश आहे. यामुळे या 'मॉक ड्रील'मध्ये प्रामुख्याने सर्व प्रकारच्या इलेक्ट्रॉनिक देखरेखीद्वारे संभाव्य हल्ला कसा रोखता येईल, याचा अभ्यास करण्यात आला.
एनएसजी कमांडोसह लष्कर, हवाई दल व मुंबई पोलिसांच्या शीघ्र कृती दलानेही सहभाग घेतला. कलिना हवाई तळावर हवाई दलाची 'एमआय१७ व्ही५' या वाहतूक श्रेणीतील हेलिकॉप्टर तैनात आहेत. याआधी एनएसजी कमांडोनी रिझर्व्ह बँक परिसरात अशा कसरती केल्या होत्या. त्यावेळी याच हेलिकॉप्टरने कमांडो रिझर्व्ह बँकेच्या इमारतीवर उतरले होते.