तिन्ही मार्गांवर आज मोगाब्लॉक

म. टा. खास प्रतिनिधी, मुंबई

मध्य, हार्बर, पश्चिम रेल्वेवर रविवार, १७ डिसेंबर रोजी सकाळी ११ ते दुपारी ४ पर्यंत मेगाब्लॉक घेण्यात येणार आहे. मध्य रेल्वेवर कल्याण ते ठाणे अप फास्ट मार्गावर स. ११.१५ ते दु. ४.१५ वाजेपर्यंत मेगाब्लॉक घेण्यात येणार आहे. हार्बर मार्गावर नेरुळ ते पनवेल स्थानकांदरम्यान अप आणि डाऊन मार्गावर स. ११.३० ते दु. ४.३० पर्यंत देखभाल-दुरुस्तीचे काम चालणार आहे. पश्चिम रेल्वेवर बोरिवली ते नायगावमध्ये स. ११ ते दु. ३ पर्यंत अप आणि डाऊन स्लो मार्गावर ब्लॉक घेतला जाणार आहे.

मध्य रेल्वेवर कल्याणहून सुटणाऱ्या अप फास्ट मार्गावरील फेऱ्या स. १०.५४ ते दु. ४.१९ पर्यंत ठाण्यापर्यंत अप स्लो मार्गावर चालवण्यात येतील. ठाणे आणि सीएसएमटीपर्यंत लोकल मुलुंड, भांडुप, विक्रोळी, घाटकोपर, कुर्ला, दादर येथे थांबतील. स. १०.१६ ते दु. ३.२२ पर्यंत सीएसएमटीहून सुटणाऱ्या सर्व डाऊन फास्ट लोकल किमान १५ मिनिटे उशिराने धावतील. या लोकल घाटकोपर, विक्रोळी, भांडुप, मुलुंड स्थानकांवर थांबतील.

रविवारी रत्नागिरी-दादर पॅसेंजर दादरऐवजी दिव्यापर्यंत चालविली जाईल. परतीच्या मार्गावर ही पॅसेंजर दादर-रत्नागिरी पॅसेंजरदेखील दिवा स्थानकावरून सुटेल. ब्लॉक कालावधीत मुंबईकडे ये-जा करणाऱ्या मेल-एक्स्प्रेस सुमारे अर्धा तास उशिरा धावतील.

हार्बर मार्गावर नेरुळ ते पनवेल स्थानकांदरम्यान अप आणि डाऊन दोन्ही मार्गांवर स. ११.२० ते दु. ४.२० वाजेपर्यंत दुरुस्तीची कामे होणार आहेत. ब्लॉकमध्ये हार्बर मार्गावरील अप आणि डाऊन लोकल गाड्यांची वाहतूक स. ११.०६ ते दु. ४.३० वाजेपर्यत नेरुळ ते पनवेलमध्ये बंद राहणार आहे. ट्रान्सहार्बर मार्गावरील लोकल स. ११.०२ ते दु. ४.२६ पर्यंत पनवेल ते नेरुळदरम्यान बंद राहणार आहे. पनवेल-अंधेरी लोकल वाहतूकही या कालावधीत बंद असेल. या मार्गावरील प्रवाशांच्या सुविधेसाठी सीएसएमटी ते नेरुळ आणि वाशीदरम्यान विशेष लोकल चालविल्या जातील.

पश्चिम रेल्वेचा ब्लॉक

पश्चिम रेल्वेवर रविवारी बोरिवली ते नायगावमध्ये ब्लॉक घेण्यात येणार आहे. स. ११ ते दु. ३ पर्यंत अप आणि डाऊन स्लो वर दुरुस्तीची कामे करण्यात येतील. विरार-वसई ते बोरिवली-गोरेगाव दरम्यानची अप आणि डाऊन स्लोवरील वाहतूक अप आणि डाऊन फास्ट मार्गावरून चालविण्यात येईल. तसेच ब्लॉकमध्ये अप आणि डाऊन मार्गावरील काही लोकल गाड्या रद्द करण्यात येणार आहेत.

बोईसर-वाणगावदरम्यान पॉवर ब्लॉक

पालघर

पश्चिम रेल्वेवरील बोईसर-वाणगाव रेल्वेस्थानकांदरम्यान उद्या, रविवारी दुरुस्तीच्या कामासाठी पॉवर ब्लॉक घेण्यात येणार आहे. त्यामुळे चर्चगेट, वांद्रे, बोरिवली आण‌ि विरार येथून डहाणू तसेच गुजरातकडे जाणाऱ्या तसेच मुंबईकडे येणाऱ्या काही गाड्या रद्द केल्या जातील.

वांद्रे येथून सकाळी सव्वा नऊला सुटणारी वापी पॅसेंजर तसेच विरारहून सकाळी ११.२५ला सुटणारी वलसाड-शटल, विरारहून सकाळी ११.५८ वाजता सुटणारी विरार-डहाणू रोड लोकल या डाऊन गाड्या तसेच डहाणूहुन सकाळी १०.०५ला सुटणारी डहाणू-विरार लोकल, वापीहून १.५५ला सुटणारी वापी-विरार शटल या गाड्या रद्द करण्यात आल्या आहेत.

बोरिवलीहून सकाळी १०.३१ला सुटणारी बोरिवली-डहाणू लोकल, तसेच विरारहून सकाळी ११.२७ला सुटणारी विरार-डहाणू लोकल या गाड्या पालघरपर्यंत धावतील. पालघरहून दुपारी १.१७ वाजता चर्चगेटच्या द‌िशेने जाणारी लोकल सुटेल आणि पालघरहून दुपारी १.५५वाजता विरारकडे जाणाऱ्या लोकल सुटतील.