म. टा. प्रतिनिधी, मुंबई
'माय नेम इज लखन' या गाण्याने लोकप्रियतेच्या शिखरावर पोहोचलेले ज्येष्ठ पार्श्वगायक मोहम्मद अझीझ यांचे मंगळवारी (६४) यांचे मंगळवारी हृदयविकाराच्या झटक्याने निधन झाले. लोकप्रिय ज्येष्ठ गायक मोहम्मद रफी यांच्या गायकीचा त्यांच्यावर कमालीचा प्रभाव होता. मोहम्मद अझीझ हे कोलकाता येथील कार्यक्रम आटोपल्यानंतर मंगळवारी ते मुंबईत परतले होते. मुंबई विमानतळावर पोहोचताच त्यांना अस्वस्थ वाटू लागले. गाडी चालकाने त्यांना नानावटी रुग्णालयात दाखल केले. त्यानंतर त्यांच्या मुलीला याबाबत कळविण्यात आले. त्यांची प्रकृती खालावतच गेली व मंगळवारी दुपारच्या सुमारास त्यांचे निधन झाल्याचे त्यांची कन्या साना अझीझने सांगितले.
अझीझ यांचा जन्म १९५४मध्ये पश्चिम बंगालमध्ये झाला. त्यांनी हिंदी चित्रपटांसह अनेक प्रादेशिक भाषांमध्ये पार्श्वगायन केले. 'दूध का कर्ज', 'खुदा गवाह', 'हीना', 'स्वर्ग', 'गीत' आदी चित्रपटांत त्यांनी गाणी गायली. 'प्यार हमारा अमर रहेगा', 'ऐ मेरे दोस्त', 'तेरी बेवफाई का शिकवा', 'मितवा भूल ना जाना', 'फूल गुलाब का', 'दुनिया में कितना गम है', 'रब को याद करू', 'बहुत जताते हो', 'तू कल चला जायेगा', 'हम तुम्हें इतना', 'माय नेम इज लखन', 'तुने प्यार की बिन बजाई', 'तुमसे बना मेरा जीवन' आदी असंख्य लोकप्रिय गीतांसाठी त्यांनी पार्श्वगायन केले. अझीझ हे ज्येष्ठ संगीतकार लक्ष्मीकांत-प्यारेलाल यांच्या पसंतीचे गायक होते. लक्ष्मी-प्यारेंनी त्यांना अनेक उत्तमोत्तम गाणी गाण्याची संधी दिली.