विनयभंगाचा प्रयत्न; प्रिया बेर्डेंनी चोपलं

मटा ऑनलाइन वृत्त । मुंबई

प्रसिद्ध मराठी अभिनेत्री प्रिया बेर्डे यांनी विनयभंगाचा प्रयत्न करणाऱ्या व्यक्तीला चोप देऊन पोलिसांच्या हवाली केल्याचं प्रकरण समोर आलं आहे. मीरा रोडमधील चित्रपटगृहात हा प्रकार घडला. त्याची गंभीर दखल घेऊन, पोलिसांनी सुनील पारसकुमार जैन (४३) याला अटक केली आहे. त्याची भुलेश्वर भागात किरकोळ सामान विक्रीची टपरी आहे.

शनिवारी संध्याकाळी प्रिया बेर्डे आपल्या मुलीसोबत सिनेमा पाहायला गेल्या होत्या. चित्रपट सुरू झाल्यानंतर काही वेळातच थिएटरमधील चार जणांच्या टोळक्यानं गोंधळ घालायला सुरुवात केली. त्यात आरोपी सुनीलही होता. ते प्रिया बेर्डे यांच्या पुढच्याच रांगेत होते. त्यांचा तमाशा पाहून काही प्रेक्षकांनी त्यांना दम देऊन बाहेर घालवलं. पण, दोघे जण तिथेच बसून राहिले आणि नंतर पुढच्या सीटवर निघून गेले. थोड्या वेळानं सुनील परत आला आणि प्रिया बेर्डे यांच्याच रांगेत, त्यांच्या शेजारची एक खुर्ची सोडून बसला. आपले सहकारी कुठे गेले, याबाबत त्यानं प्रिया यांना विचारलं. त्याला मोघम उत्तर देऊन त्या पुन्हा सिनेमा पाहू लागल्या.

काही वेळातच मला कुणीतरी स्पर्श करत असल्याचं जाणवलं. मी आजूबाजूला पाहिलं, तेव्हा गोंधळ घालणारी व्यक्तीच मला छेडण्याचा प्रयत्न करत असल्याचं लक्षात आलं. मी खवळले आणि त्याला थोबाडीतच लगावली. मी त्याला पकडून सुरक्षारक्षकांकडे सोपवणार इतक्यात, तो धक्का देऊन पळाला. पण, गेटवरच्या गार्ड्सनी त्याला पकडलं आणि नंतर पोलिसांच्या हवाली केलं. हा सगळा प्रकार खूपच विचित्र होता. माझी मुलगी तर पार गांगरली होती, असं प्रिया बेर्डेंनी सांगितलं.

या विनयभंग प्रकरणी काशिमीरा पोलिसांनी सुनील जानीला अटक केली असून त्याच्यावर ३५४ आणि ५०९ या कलमांन्वये गुन्हा नोंदवला आहे.

दरम्यान, प्रत्येक स्त्रीने स्वतःच्या सुरक्षेची काळजी घेतली पाहिजे, छेड काढणाऱ्या, त्रास देणाऱ्या व्यक्तीला न घाबरता सडेतोड उत्तर दिलं पाहिजे, पोलिसांच्या मदतीने त्याला शिक्षा दिले पाहिजे, असं मत प्रिया बेर्डेंनी व्यक्त केलंय.