फलाटावर भरदिवसा विनयभंग; प्रवाशांनी चांगलाच दिला चोप, गोरेगाव स्थानकातील धक्कादायक प्रकार

मुंबई : गर्दीचा फायदा घेऊन पादचारी पूलावर तरुणीला धक्का देऊन त्यानंतर तिचा विनयभंग करण्याचा धक्कादायक प्रकार गोरेगाव स्थानकावर मंगळवारी सकाळी गर्दीच्या वेळेत घडला. फलाटावरील रेल्वेप्रवाशांनी या आरोपीला पकडून पोलिसांच्या स्वाधीन केले.

गोरेगाव ते अंधेरी असा प्रवास करण्यासाठी ही पीडित तरुणी फलाट क्रमांक चारवर पोहोचण्यासाठी पुलावरून जात होती. सकाळी पावणेदहाची वेळ असल्याने पूलावर गर्दी होती. या वेळी २६ वर्षीय आरोपी अम्मु कुमार सिंगने तिला समोरून येऊन धक्का मारला. या धक्क्यामुळे तरुणी घाबरली. 'समोर बघून नीट चाला', असे तिने त्याला सुनावले. दरम्यान, आरोपीने तिचा पाठलाग सुरू ठेवला. फलाट क्रमांक ४ वर उतरताच आरोपीने पुन्हा एकदा तिला धक्का दिला. यावर संतापलेल्या तरुणीने त्याला शिवीगाळ करण्यास सुरुवात केली.

आरोपीने तिच्या खांद्याला पकडून तिचे चुंबन घेण्याचा प्रयत्न केला. तरुणीने विरोध करत त्याला धक्का दिला. या झटापटीत ही तरुणी फलाटावर कोसळली. त्याने तिच्यावर जबरदस्ती करण्यास सुरुवात केली. यावेळी फलाटावर उपस्थित प्रवाशांनी आरोपीला बाजूला केले. त्याला चोप दिल्यानंतर प्रवाशांनीच आरोपीला पोलिसांच्या हवाली केले. बोरिवली रेल्वे पोलिसांनी आरोपी अम्मु कुमार सिंगवर गुन्हा दाखल केला आहे. एकतर्फी प्रेमातून आरोपीने हे कृत्य केल्याचा संशय पोलिसांनी व्यक्त केला आहे. या प्रकरणी अधिक तपास सुरू असल्याचे बोरिवली रेल्वे पोलिसांकडून स्पष्ट करण्यात आले.