मुंबईत डिसेंबरमधील आत्तापर्यंतचा विक्रमी पाऊस, सर्व रेकॉर्ड मोडले

म. टा. विशेष प्रतिनिधी, मुंबई

अरबी समुद्रात निर्माण झालेल्या प्रणालीच्या प्रभावामुळे चालू महिन्याच्या पहिल्याच दिवशी कोसळलेला पाऊ हा डिसेंबरमधील आत्तापर्यंतचा विक्रमी पाऊस ठरला आहे. बुधवारी सकाळपासून सुरू झालेल्या पावसाची संततधार रात्री उशिरापर्यंत कायम होती. गुरुवारी सकाळी पाऊस ओसरला, मात्र सूर्याचे दर्शनही विलंबानेच झाले. डिसेंबरमधील सरासरी पावसाच्या एकूण ५७ पट पाऊस यंदा १ डिसेंबरच्या २४ तासांमध्ये नोंदवला गेला आहे.

सांताक्रूझ येथे बुधवारी सकाळी ८.३० ते गुरुवारी सकाळी ८.३० या कालावधीत ९१.२ मिलीमीटर तर, कुलाबा येथे ९०.२ मिलीमीटर पावसाची नोंद झाली. २०१७मध्ये २४ तासांमध्ये ५३.८ मिलीमीटर पाऊस नोंदला गेला. त्याचवर्षी महिन्याभरातील डिसेंबरमधील सर्वाधिक पाऊसही नोंदला गेला होता. त्यावर्षी डिसेंबरमध्ये एकूण ७५.८ मिलीमीटर पाऊस पडला होता. मात्र हा उच्चांक १ डिसेंबरला मोडला गेला.


२०१७मध्ये कुलाबा येथे सुमारे ८२ मिलीमीटर पावसाची नोंद झाली होती. गेल्या वर्षीही मुंबईमध्ये पाऊस पडला. मात्र डिसेंबर २०२०मध्ये एकूण ७.३ मिलीमीटर पाऊस नोंदवला गेला. १४ डिसेंबरला २४ तासांत ४.८ मिलीमीटर पावसाची नोंद झाली होती. कुलाबा येथे ७.३ मिलीमीटर पाऊस नोंदला गेला होता. अरबी समुद्रातील चक्रीय वात स्थिती, पश्चिमी प्रकोप यांच्या संयुक्त परिणामामुळे मुंबईमध्ये जोरदार पाऊस पडल्याचे हवामान विभागाच्या अधिकारी सुषमा नायर यांनी सांगितले. येत्या आठवड्यामध्ये कोकणात तुरळक ठिकाणी हलक्या सरी पडू शकतात मात्र मुंबईमध्ये सध्या पावसाची कोणतीही चिन्हे नसल्याचे त्यांनी स्पष्ट केले.

वातावरणात गारठा

बुधवार आणि गुरुवारच्या मध्यरात्रीही पाऊस सुरू होता. मात्र त्यानंतर मुंबईसाठी पावसाने विश्रांती घेतली. गुरुवारी संध्याकाळी ५.३०च्या सुमारास सांताक्रूझ येथे ४.३ मिलीमीटर पावसाची नोंद झाली. तर, कुलाबा येथे ५.४ मिलीमीटर पावसाची नोंद झाली. पावसामुळे हवेत दिवसभर गारवा होता. गुरुवारी पहाटे किमान तापमान बुधवारपेक्षा घटले. कुलाबा आणि सांताक्रूझ या दोन्ही ठिकाणी किमान तापमान १८.५ अंश सेल्सिअस नोंदवले गेले तर पहाटे आणि संध्याकाळीही आर्द्रता ९० टक्क्यांपर्यंत पोहोचली होती. गुरुवारी संध्याकाळी कुलाबा येथे २५.८ अंश सेल्सिअस तर सांताक्रूझ येथे २६.४ अंश सेल्सिअस कमाल तापमान होते. कुलाब्याचे तापमान गुरुवारी सकाळी सरासरीहून तब्बल ३.५ अंश सेल्सिअसने घटले.

इतरत्र पारा चढाच

कोकण विभाग आणि विदर्भातील तुरळक ठिकाणे वगळता किमान तापमानाचा पारा डिसेंबरच्या प्रत्येक ठिकाणच्या सरासरी किमान तापमानाच्या तुलनेत चढा आहे. विदर्भामध्ये बहुतांश ठिकाणी किमान तापमान १५ अंशांपेक्षा कमी नोंदवले गेल आहे. तर मराठवाड्यात १७ ते १९ अंशांदरम्यान आहे. मराठवाड्यातही सरासरीच्या तुलनेत पारा चढा आहे. मध्य महाराष्ट्रामध्ये १५ ते २० अंशांदरम्यान किमान तापमानाचा पारा नोंदला गेला. आजपासून सुरू होणाऱ्या ९४ व्या अखिल भारतीय मराठी साहित्य संमेलनाच्या शहरामध्ये, नाशिकमध्ये गुरुवारी सकाळी १४ अंश सेल्सिअस तापमानाची नोंद झाली. मात्र हे तापमानाही सरासरी तापमानापेक्षा दोन अंशांनी अधिक होते.

राज्यातील पर्जन्यमान

गुरुवारी सकाळी ८.३० पर्यंतच्या २४ तासांमध्ये कोल्हापूर येथे ६९, महाबळेश्वर येथे ९२, मालेगाव येथे ५५, नाशिक येथे ६३.८, पुणे येथे ७५.४, सांगली येथे ५७.८ तर सातारा येथे ९२.५ मिलीमीटर पावसाची नोंद झाली. डहाणूमध्ये २४ तासांत सर्वाधिक ११४.४ मिलीमीटर पाऊस नोंदवला गेला.