मुलाला वाचवण्यासाठी आईची बिबट्यावर झडप

मटा ऑनलाइन वृत्त । मुंबई

आरे कॉलनीतल्या चाफ्याच्या पाड्यावर आपल्या पोटच्या गोळ्याला फरफटत घेऊन जाणाऱ्या बिबट्याशी एका मातेने थरारक झुंज दिली. आपल्या ३ वर्षाच्या मुलाला बिबट्या ओढून नेत असल्याचे दिसताच आईने आपल्या जीवाची पर्वा न करता या बिबट्यावरच उडी मारली...

प्रमिला रिंजाड (२८) असे या महिलेचे नाव आहे. सोमवारी रात्री आपल्या घराजवळच्याच झुडपात नैसर्गिक विधीसाठी त्या गेल्या. त्यांच्या मागोमाग त्यांचा ३ वर्षांचा चिमुकला प्रणयही आला. आपल्या मागे प्रणय येतोय याची त्यांना कल्पना नव्हती. तितक्यात झुडपाजवळ दबा धरून बसलेल्या बिबट्याने प्रणयवर हल्ला केला. प्रणय धाय मोकलून रडू लागल्यावर प्रमिला यांना सारा प्रकार लक्षात आला. त्यांनी मदतीसाठी आरडाओरडा केला. पण तोपर्यंत बिबट्याने प्रणयला आपल्या जबड्यात उचलले होते. प्रणयला बिबट्या नेतोय हे पाहताच प्रमिला यांनी सरळ बिबट्यावरच झेप घेतली. अचानक झालेल्या या हल्ल्याने बिबट्या बावचळला आणि त्याने प्रणयला तिथेच टाकून धूम ठोकली.

बिबट्याच्या हल्ल्यात प्रणय जखमी झाला होता. त्याच्या पाठीवर बिबट्याचे दात, नखे लागली होती, गुडघाही दुखावला होता. पाड्यातले लोक जमा झाले आणि प्रणयला रुग्णालयात नेण्यात आले. त्याच्यावर उपचार करून त्याला सोडण्यात आले. प्रणयच्या आईच्या या साहसाचे पाड्यावरचे सगळे लोक कौतुक करत आहेत.