म. टा. खास प्रतिनिधी, मुंबई
सिग्नलजवळ ब्रेकऐवजी अॅक्सिलेटर दाबले गेल्याने धारावी टी जंक्शनवर मंगळवारी सायंकाळी झालेल्या मोटार अपघातात चार जण जखमी झाले.
काळबादेवीत राहणारी ध्रुवी जैन (१९) मंगळवारी सायंकाळी भाड्याची गाडी घेऊन दोघा मैत्रिणींसह वांद्रे येथे जात होती. धारावीतील टी जंक्शन येथे लाल सिग्नल असल्याने तिने ब्रेकऐवजी अॅक्सिलेटवर पाय ठेवला. अनवधानाने झालेल्या प्रकाराने गाडीने वेग घेतला आणि रस्त्यावरील रिक्षा, बस, दुचाकीसह अन्य गाडीस जोरदार धडक दिली. ही धडक वर्मी लागल्याने चार जण जखमी झाले असून, त्यांची प्रकृती स्थिर आहे. कायद्याची पहिल्या वर्गाची विद्यार्थिनी असलेल्या ध्रुवी हिला गाडी वापरू देण्यास तिचे वडील परवानगी देत नव्हते. म्हणून तिने भाड्याने गाडी घेऊन मैत्रिणींनाही सोबत घेतले. वांद्रे येथे जात असतानाच हा अपघात झाला. ही गाडी अन्य गाडी, दुचाकी, रिक्षा, बसला धडकली. ध्रुवी हिला अटक करून तिची जामिनावर सुटका झाली आहे.