आंदोलक एसटी कर्मचाऱ्यांना दिलासा

मुंबई : दिवाळीत संप केलेल्या कर्मचाऱ्यांना परिवहनमंत्री व एसटी महामंडळाचे अध्यक्ष दिवाकर रावते यांनी मंगळवारी घेतलेल्या निर्णयामुळे दिलासा मिळाला आहे. एक दिवसाच्या संपासाठी आठ दिवस याप्रमाणात या संपकरी कर्मचाऱ्यांचे वेतन कापण्याचा निर्णय रावते यांनी मागे घेतला आहे. यासंदर्भातील परिपत्रक मागे घेण्यात आले आहे, त्यामुळे संपकरी कर्मचाऱ्यांना दंडात्मक कारवाईला सामोरे जावे लागणार नाही.

ऐन दिवाळीत १७ ते २० ऑक्टोबर यादरम्यान एसटी कर्मचारी वेतनवाढीच्या मागणीसाठी संपावर होते. या संपकरी एसटी कर्मचाऱ्यांवर २००५ च्या निर्णयानुसार दंडात्मक कारवाई होणार होती. तत्कालिन एसटी महामंडळ अध्यक्ष सुधाकर पारिचारक यांनी हा निर्णय घेतला होता.