‘मटा हेल्पलाइन’च्या कार्यक्रमात मिळणार शिक्षणभरारीसाठी बळ
म. टा. खास प्रतिनिधी, मुंबई
मेणबत्तीच्या मिणमिणत्या प्रकाशात केलेला अभ्यास, आईची सेवा करत, घरकाम सांभाळून दहावीच्या परीक्षेत मिळवलेले खणखणीत गुण, शाळा गाठण्यासाठीचा पाच किमीचा प्रवास...विद्यार्थ्यांच्या या मेहनतीला आता बळ मिळणार आहे. ‘मटा हेल्पलाइन’ उपक्रमाच्या माध्यमातून ‘मटा’च्या वाचकांनी केलेली आर्थिक मदत रुईया कॉलेजमध्ये आज, शुक्रवारी या विद्यार्थ्यांकडे सुपूर्द केली जाणार आहे. या कार्यक्रमासाठी केंद्रीय मनुष्यबळ विकासमंत्री प्रकाश जावडेकर आणि राज्याचे शिक्षणमंत्री विनोद तावडे उपस्थित राहणार आहेत.
दहावीत यशस्वी भरारी घेतलेल्या विद्यार्थ्यांच्या स्वप्नांना केवळ आर्थिक चणचणीमुळे तडा जाऊ नये, म्हणून गेली आठ वर्षे ‘बळ द्या पंखांना’ हा उपक्रम ‘महाराष्ट्र टाइम्स’ राबवत आहे. या उपक्रमाच्या माध्यमातून अनेक विद्यार्थ्यांनी परदेशी उच्चशिक्षणाचेही ध्येय गाठले आहे. यंदाही वाचकांनी मुंबई आणि कोकणातील २० गरजू विद्यार्थ्यांना मदतीचा हात दिला. त्यांच्या डोळ्यातील स्वप्न विझू नयेत यासाठी हजारो वाचकांनी भरभक्कम आधार दिला आहे.
‘महाराष्ट्र टाइम्स’च्या प्रतिनिधींनी विद्यार्थ्यांच्या घरी प्रत्यक्ष भेट देऊन त्यांची परिस्थिती पाहून खात्री करून घेतली. त्यानंतर रोहिणी साटम, गौरव पानगले, श्रद्धा देवकर, प्रतीक्षा थिटे, अभिजीत बाने, सचिन गुरव, तृप्ती माजगुणकर, शुभम शेलार, वैशाली बनसोडे, आदित्य चव्हाण, सेजल चव्हाण, प्रथमेश परीट, ममता जाधव, गौरी भाकरे, श्रुती बापट, हर्षल देशमुख, अंकिता गाडे, अक्षता चव्हाण, सूर्यकांत पाटील, सिमरन गजमल या विद्यार्थ्यांची उपक्रमासाठी निवड करण्यात आली. या उपक्रमाचे कौतुक आणि त्याला हातभार लावण्याचे आवाहन उद्योग, मनोरंजन, सामाजिक क्षेत्रातील अनेक दिग्गजांनी केले होते. वाचकांनी, विविध क्षेत्रांतील दिग्गजांनी दिलेल्या पाठिंब्याच्या बळावर हा दानयज्ञ आणि ज्ञानयज्ञ असाच सतत पेटता राहणार आहे, याची खात्री वाटते.
ठिकाण : रुईया कॉलेजचे सभागृह, माटुंगा
दिनांक : आज,
१९ ऑगस्ट, २०१६
वेळ : स. १० वा.