​ खंडणीसाठी मालकाच्या मुलीचे अपहरण

दोघांना अटक

म. टा. प्रतिनिधी, मुंबई

गर्भवती पत्नीच्या उपचारासाठी पैशांची कमतरता असल्याने मालकाच्या ५ वर्षांच्या मुलीचे अपहरण करून १० लाखांची खंडणी मागणाऱ्यास गुन्हे शाखा ६ च्या पोलिसांनी अटक केली आहे. इम्रान शेख (२४) आणि मोहम्मद अब्बास खान (३६) अशी या दोघांची नावे आहेत.

मानखुर्दच्या शिवाजीनगर परिसरात राहणाऱ्या मुलीच्या वडिलांचा धारावी येथे बॅगनिर्मितीचा कारखाना आहे. या कारखान्यात इम्रान कामाला होता. वैयक्तिक कामासाठी त्याने अनेकांकडून पैसे घेतले होते. बायको गर्भवती असल्याने तिच्या उपचारासाठी त्याला पैशांची नितांत गरज होती. त्यासाठी इम्रानने मालकाकडे २ लाख रुपये उधारी मागितली होती. मात्र इतरांप्रमाणेच इम्रान आपलेही पैसे बुडवेल, या भीतीने मालकाने त्याला पैसे दिले नाहीत. त्यामुळे हताश झालेल्या इम्रानने मोहम्मद अब्बास खान या मित्राच्या मदतीने मालकाच्या मुलीचे अपहरण करून त्याच्याजवळून खंडणी मागण्याचा कट रचला. त्यानुसार शुक्रवारी त्याने मालकाच्या ५ वर्षीय मुलीचे अपहरण करून मुलीच्या वडिलांकडे १० लाखांची खंडणी मागितली. मुलीच्या वडिलांनी ट्रॅाम्बे पोलिसात धाव घेतली. पोलिसांनी हा गुन्हा अधिक तपासासाठी गुन्हे शाखा ६कडे वर्ग केला. मालकाने पोलिसात धाव घेतल्याचे कळाल्यानंतर इम्रानने भीतीपोटी रविवारीच मुलीला धारावी येथील मालकाच्या कारखान्याजवळ सोडले.

सीसीटीव्हीची मदत

दरम्यान मुलीच्या वडिलांना आलेल्या फोनचा पोलिसांनी माग काढला असता. या फोनमधील सिमकार्ड शिवाजी नगर येथील मुलीच्या घराशेजारूनच खरेदी केल्याचे तपासात पुढे आले पोलिसांनी घटनास्थळावरील सीसीटीव्ही फूटेज तपासले असता, मुलीचे अपहरण होण्याच्या दोन दिवस आधी इम्रान त्या ठिकाणच्या सीसीटीव्ही कॅमेऱ्यात दिसून आला होता. पोलिसांनी इम्रानजवळ चौकशी केली असता इम्रानने पोलिसांची दिशाभूल करण्याचा प्रयत्न केला. मात्र पोलिसांनी खाकीचा धाक दाखवल्यानंतर इम्रानने गुन्ह्यांची कबुली दिली. या गुन्ह्यांत इम्रानने खंडणीतील अर्धी रक्कम देण्याचे आमीष देत मोहम्मद अब्बास खान याला सोबत घेतले होते. या प्रकरणी गुन्हे शाखा ६ चे पोलिस अधिक तपास करत आहेत.