मुंबईः २१ वर्षीय तरुणाला २० वर्षाची शिक्षा

मुंबई

नग्न फोटो दाखवून १४ वर्षीय मुलीवर बलात्कार करणाऱ्या आरोपीला विशेष पोस्को कोर्टाने सोमवारी २० वर्षाची शिक्षा ठोठावली. सनी कांबळे असे या आरोपीचे नाव असून तो २० वर्षाचा आहे.

आरोपी सनी कांबळे हा २०१७ मध्ये शाळेजवळील बस स्टॉपच्या जवळ पीडित मुलीला भेटला होता. त्यावेळी सनीने तिला त्याचा मोबाइल नंबर एका कागदावर लिहून दिला होता. हा नंबर खरा आहे की खोटा हे तपासण्यासाठी पीडित मुलीनं तिच्या आईच्या मोबाइलवरून नंबर डायल केला. परंतु, त्यानंतर सनीने परत फोन केला व तू मला फार आवडते असे सांगितले. मी फक्त नंबर तपासण्यासाठी फोन केला होता, तू मला आवडत नाही, असे सांगून पीडित मुलीनं फोन कट केला. परंतु, त्यानंतर आरोपी सनी कांबळे रोज तिला बसस्टॉपवर भेटायला लागला. तिच्याशी बोलण्याचा प्रयत्न करू लागला. तू जर मला भेटली नाही किंवा बोलली नाही तर मी तुझ्या कुटुंबाला आणि तुला जीवे मारून टाकेन अशी धमकी द्यायला लागला, असे पीडित मुलीने कोर्टात सांगतिले.

एके दिवशी मित्रासोबत पार्कमध्ये गेल्यानंतर सनी कांबळे तेथे आला व माझ्या कानशीलात लगावली. २६ नोव्हेंबर २०१७ रोजी मी मंदिरात गेले होते. आरोपी त्या ठिकाणी तोंडाला स्कार्फ बांधून आला. त्याने हाताला धरून बळजबरीने बाजुच्या खोलीत नेले. तेथे नग्न फोटो दाखवून माझ्यावर बलात्कार केला. त्यानंतर त्याने मला घरी सोडले. काही दिवसांनंतर अश्लिल फोटो मित्राला दाखवले. याबद्दल विचारले असता त्याने माझ्याशी वाद घातला, असे पीडित मुलीने कोर्टात सांगतिले. सनीच्या या सर्व प्रकाराला कंटाळून त्याच्याविरुद्ध पोलीस स्टेशनमध्ये जाऊन तक्रार नोंदवल्याची माहितीही मुलीनं कोर्टात दिली. मुलीच्या तक्रारीनंतर आरोपी सनी कांबळेविरुद्ध गुन्हा दाखल करण्यात आला. विशेष पोस्को कोर्टाने आरोपीला २० वर्षाची शिक्षा ठोठावली आहे.

ही बातमी इंग्रजीमध्ये वाचा