‘सूरदासी आशा’ कार्यक्रम आज

म. टा. प्रतिनिधी, मुंबई

ज्येष्ठ गायिका आशा खाडिलकर यांच्या कारकीर्दीच्या सुवर्णमहोत्सवी वर्षाच्या निमित्ताने त्यांना मानवंदना देण्यासाठी त्यांच्या कन्या आणि शिष्या वेदश्री खाडिलकर-ओक यांच्या कल्पनेतून निर्माण झालेल्या ‘सूरदासी आशा’ या कार्यक्रमाचे आज, शुक्रवारी २४ फेब्रुवारी रोजी आयोजन करण्यात आले आहे. उत्तुंग या आशा खाडिलकर आणि माधव खाडिलकर यांच्या संस्थेच्या माध्यमातून हा कार्यक्रम सादर करण्यात येईल. ‘महाराष्ट्र टाइम्स’ या कार्यक्रमाचा मीडिया पार्टनर आहे.

आशा खाडिलकर यांचा वयाच्या तेराव्या वर्षी सुरू झालेला प्रवास आज अनोख्या उंचीवर पोहोचला आहे. याच निमित्ताने वेदश्री ओक-खाडिलकर ओंकार खाडिलकर यांच्या सोबतीने हा प्रवास उलगडणार आहेत. त्यांना आदित्य ओक, निषाद करलगीकर, विश्वास महाशब्दे, राजेंद्र भावे साथसंगत करणार आहेत. हा कार्यक्रम, पु.ल. देशपांडे सभागृह, टिळक मंदिर, विलेपार्ले पूर्व येथे आज, शुक्रवारी सायं. ५.३० वाजता होईल. या कार्यक्रमाचे निवेदन मंगला खाडिलकर करतील.