कोर्टात न्यायाधीशांसमोरच आरोपींवर चाकूहल्ला

मटा ऑनलाइन वृत्त । मुंबई

मुंबईतील भोईवाडा न्यायालयात न्यायाधीशांसमोरच तक्रारदाराने दोघा आरोपींवर चाकूहल्ला केल्याची खळबळजनक घटना घडली आहे. यात दोघे जखमी झाले आहेत. त्यांना केईएम रुग्णालयात दाखल करण्यात आले. या प्रकरणी पोलिसांनी हल्लेखोर तक्रारदाराला अटक केली आहे.

एका मारहाण प्रकरणात पोलिसांनी तीन आरोपींना भोईवाडा न्यायालयात हजर केले होते. न्यायालयाने तिघांनाही जामीन मंजूर केला. त्यामुळे तक्रारदाराने दोन आरोपींवर चाकूहल्ला केला. पोलिसांनी हल्लेखोराला अटक केली आहे. हल्ल्यात जखमी झालेल्या दोघांना तातडीने केईएम रुग्णालयात दाखल केले. दोघांचीही प्रकृती स्थिर आहे, असे पोलिसांनी सांगितले. दरम्यान, हल्लेखोर न्यायालयात चाकू घेऊन आलाच कसा, असा प्रश्न उपस्थित करण्यात येत आहे.