बेस्टची एसी बससेवा सोमवारपासून बंद

मटा ऑनलाइन वृत्त । मुंबई

बेस्टकडून चालवण्यात येणाऱ्या सर्व वातानुकूलित बस सोमवार, १७ एप्रिलपासून बंद करण्याचा निर्णय घेण्यात आला आहे. एसी बस तोट्यात चालत असल्याने तसेच बेस्टची आर्थिक स्थिती नाजूक असल्याने हा निर्णय घेण्यात आला आहे. दरम्यान, ऐन उन्हाळ्यात एसी बस बंद होत असल्याने या बसने प्रवास करणाऱ्या प्रवाशांना गारेगार प्रवासास मुकावे लागणार आहे.

बेस्टच्या २५ मार्गांवर एसी बस धावत आहेत. बेस्टच्या ताफ्यात सध्या २६६ एसी बस आहेत. या सर्व बस सोमवारपासून प्रवाशांच्या सेवेतून बाद होणार आहेत. याबाबत बेस्टने एका प्रसिद्धीपत्रकाद्वारे माहिती दिली असून प्रवाशांची दिलगीरीही व्यक्त केली आहे.

पासधारकांना दिलासा

बेस्टच्या एसी बसमधून सध्या दरदिवशी १८ ते २० हजार प्रवासी प्रवास करतात. त्यात २१६ प्रवासी पासधारक आहेत. हे पासधारक सोमवारपासून पासची मुदत असेपर्यंत साध्या तसेच मर्यादित बसमधून प्रवास करू शकतात किंवा आपल्या पासची उर्वरित रक्कम परत हवी असल्यास ती घेऊ शकतील, असे बेस्टकडून स्पष्ट करण्यात आले आहे.