बेस्ट कर्मचाऱ्यांचा ९ ऑक्टोबरला संपाचा इशारा

मुंबईः विविध मागण्या मंजूर करण्यासाठी बेस्ट वर्कर्स युनियनने ९ ऑक्टोबरला संपाचा इशारा दिला आहे. बेस्टच्या महाव्यवस्थापकाला संपाची नोटीस पाठवून हा इशारा देण्यात आला आहे.

महाव्यवस्थापकाला पाठवलेल्या संपाच्या नोटिशीत म्हटलेय की, बेस्ट वर्कर्स युनियनने १६ मे २०१६ रोजी सादर केलेले मागणीपत्र व ६ ऑगस्ट २०१९ रोजी सादर केलेले पर्यायी मागण्यांच्या पत्राच्या आधारे बेस्ट वर्कर्स युनियनसोबत वाटाघाटी करून अंतिम करार करावा. जोपर्यंत करार होत नाही, तोपर्यंत बेस्ट उपक्रमाच्या कर्मचाऱ्यांना १० हजार रुपयांची मासिक अंतरिम वाढ देण्यात यावी. आम्हाला कोणताही संप करायचा नाही. परंतु, व्यवस्थापक आमच्यापासून दूर गेल्याने आमच्यापुढे दुसरा पर्याय नाही, असे वर्कर युनियनचे नेते शशांक राव यांनी सांगितले.