कॅन्सरचा धोका तिप्पट

लठ्ठपणा, मधुमेह स्त्रियांसाठी धोकादायक

म. टा. ‌विशेष प्रतिनिधी, मुंबई

बदलत्या जीवनशैलीमुळे महिलांमधील लठ्ठपणा वाढत आहे. परिणामी महिलांमध्ये रक्तदाब, मधुमेह, कॅन्सरचे प्रमाण वाढत आहे. पण महिलांची कंबर, पोट व पार्श्वभागाचे प्रमाण वाढले तर महिलांना स्तनाच्या कॅन्सरचा धोका तीन पटीने वाढत असल्याचे निष्कर्ष टाटा कॅन्सर रुग्णालयातील डॉक्टरांनी केलेल्या एका अभ्यासाअंती काढला आहे.

महिलांमधील लठठपणा व कॅन्सरच्या वाढत्या धोक्याच्या पार्श्वभूमीवर टाटा कॅन्सर रुग्णालयातील डॉक्टरांच्या टीमने २००९ ते २०१३ या काळात महिलांचा अभ्यास केला. त्यात दोन गट केले होते. त्यात स्तनाच्या कॅन्सरच्या १ हजार ६३३ महिला व स्तनाचा कॅन्सर नियंत्रणात आलेल्या १ हजार ५०४ महिला होत्या. तसेच मासिक पाळी सुरू असलेल्या १ हजार ६५९ महिला व रजोनिवृत्तीमधील १ हजार ४७८ महिलांचा समावेश होता. त्यांचा अभ्यास करून हा निष्कर्ष काढला आहे.

रजोनिवृत्तीनंतर महिलांमध्ये कॅन्सरचे प्रमाण वाढत असल्याचे डॉक्टर सांगत असले तरी कोणत्याही वयात कंबरेचा लठ्ठपणा व पार्श्वभाग याचा संबंध स्तनाच्या कॅन्सरशी असल्याचे या अभ्यासाअंती डॉक्टरांना आढळून आले आहे. काही महिला सडपातळ असतात. काही महिलांचा बॉडी मास इंडेक्स (बीएमएस) कमी असतो. पण त्यांची कंबर, पोट व पार्श्वभाग प्रमाणाच्या बाहेर वाढलेला असतो अशा महिलांमध्ये स्तनाच्या कॅन्सरचा धोका वाढतो. ८० सेंटीमिटरपेक्षा कंबर अधिक असल्यास स्तनाच्या कॅन्सरचा धोका वाढत असल्याचे डॉक्टरांना या अभ्यासाअंती आढळून आले आहे. टाटा रुग्णालयातील कॅन्सर तज्ज्ञांनी सादर केलेले हे नवीन संशोधन युरोपियन जर्नल ऑफ कॅन्सरमध्ये प्रसिध्द झाले आहे.

-सुटलेले पोट, वाढलेली कंबर व वाढलेल्या पार्श्वभागामुळे स्तनाच्या कॅन्सरचा धोका वाढतो

-शरीर सडपातळ असेल पण कंबर व पोटावरची चरबी वाढणे धोक्याचे

-कंबरेचे माप ८० सेंटीमिटरपेक्षा अधिक असल्यास स्तनाच्या कॅन्सरचा धोका तीनपटीने वाढतो

-बीएमआय (बॉडी मास इंडेक्स) कमी पण लठ्ठपणा असेल तर धोका अधिक