​ इंजिन बिघाडामुळे अडली ‘मरे’

सलग दुसऱ्या दिवशी प्रवाशांना फटका

म. टा. खास प्रतिनिधी, मुंबई

बदलापूर येथे प्रवाशांच्या आंदोलनास एक दिवस उलटत नाही, तोच शनिवारी दुपारी ३ वाजण्याच्या सुमारास मध्य रेल्वेवर मशीद बंदर आणि सँडहर्स्ट रोडमध्ये एक्स्प्रेसच्या इंजिनात बिघाड झाला. त्यामुले सलग दुसऱ्या दिवशी मध्य रेल्वे विस्कळीत झाली. यामुळे निर्माण झालेल्या गोंधळाचा फटका प्रवाशांना सायंकाळी उशीरापर्यंत बसला.

मरेवर मशीद बंदर ते सँडहर्स्ट रोड स्टेशनदरम्यान शनिवारी दुपारी ३ वाजण्याच्या सुमारास एका एक्स्प्रेसचे इंजिन बिघडल्याने डाउन फास्ट जलद मार्गावरील वाहतूक सुमारे २० मिनिटे विस्कळीत झाली. इंजिन रुळावरून हटवण्यास सुमारे अर्धा तास लागला. या कालावधीत काही लोकल स्लो मार्गावर वळवण्यात आल्या. सीएसटीहून सुटणाऱ्या सिंहगड एक्स्प्रेसला त्याचा फटका बसला. लोकलच्याही एकामागोमाग रांगा लागल्याने अनेक प्रवाशांनी रुळांवरून उतरून स्टेशन गाठले. इंजिनातील बिघाड अर्धा तासाने दुरुस्त झाल्यानंतर वाहतूक हळुहळू सुरू झाली.

बिघाडाची मालिका

२१ जून ‍ः दादर येथे प्लॅटफॉर्म क्र. पाचजवळ मांडवी एक्स्प्रेसच्या इंजिनमध्ये बिघाड झाला. संततधार पावसामुळे समस्या अधिक तीव्र झाल्याने जवळपास २५० लोकल फेऱ्या रद्द करण्यात आल्या होत्या.

७ जुलै ‍ः सीएसटीहून निघालेल्या मुंबई-बेंगळुरू उद्यान एक्स्प्रेसच्या इंजिनमध्ये बिघाड झाल्याने लोकलच्या ७० हून अधिक फेऱ्या रद्द.

१९ जुलै ‍ः बदलापूर-अंबरनाथमध्ये मालगाडीचे इंजिन बंद पडल्याने लोकल सेवा अंबरनाथपर्यंतच चालवल्या गेल्या.