मध्य रेल्वे उशिराने; कल्याणजवळ रुळाला तडा

मटा ऑनलाइन वृत्त । मुंबई

मध्य रेल्वे मार्गावरील विठ्ठलवाडी-कल्याण स्थानकादरम्यान रुळाला तडा गेल्याने लोकल सेवा विस्कळीत झाली आहे. लोकलगाड्या २० मिनिटे उशिराने धावत आहेत. ऐन गर्दीच्या वेळी खोळंबा झाल्याने प्रवाशांना मनस्ताप सहन करावा लागत आहे.

विठ्ठलवाडी-कल्याणदरम्यान आज सकाळी रेल्वे रुळाला तडा गेला. परिणामी मुंबईकडे जाणाऱ्या लोकलगाड्या २० मिनिटे उशिराने धावत आहेत. ऐन गर्दीच्या वेळी वाहतूक विस्कळीत झाल्याने स्थानकांवर गर्दी झाली होती. दरम्यान, काही वेळाने रेल्वे रुळाची दुरुस्ती करण्यात आली असली तरी मुंबई सीएसएमटीकडे जाणाऱ्या गाड्या उशिरानेच धावत आहेत. रेल्वेसेवा वारंवार विस्कळीत होत असल्याने अनेक प्रवाशांनी प्रशासनाविरोधात संताप व्यक्त केला.