'दासावा'मध्ये रंगणार 'मुंबई शहर ग्रंथोत्सव'

मुंबई :

१११ वर्षांचा समृद्ध वारसा लाभलेल्या दादर सार्वजनिक वाचनालयात १० व ११ डिसेंबर असे दोन दिवस मुंबई शहर ग्रंथोत्सवाचे आयोजन करण्यात आले असून या महोत्सवात वाचन संस्कृती आणि ग्रंथ चळवळीला वाहिलेल्या विविध दर्जेदार, प्रबोधनात्मक, मनोरंजनात्मक कार्यक्रमांची रेलचेल असणार आहे.

राज्याचे ग्रंथालय संचालनालय, मुंबई शहर जिल्हा ग्रंथालय अधिकारी कार्यालय आणि दादर सार्वजनिक वाचनालय यांच्या संयुक्त विद्यमाने 'दासावा'च्या धुरू सभागृहात या ग्रंथोत्सवाचे आयोजन करण्यात आले आहे.

सोमवार दि. १० डिसेंबर रोजी सकाळी ९ वाजता ग्रंथपूजन व भव्य ग्रंथदिंडीने हा ग्रंथोत्सव सुरू होणार आहे. ज्येष्ठ साहित्यिक रत्नाकर मतकरी यांच्याहस्ते ग्रंथदिंडीचे उद्घाटन केले जाणार आहे. त्यानंतर सकाळी १० वाजता मुंबईचे महापौर विश्वनाथ महाडेश्वर यांच्याहस्ते, राज्याचे सांस्कृति कार्यमंत्री विनोद तावडे यांच्या प्रमुख उपस्थितीत ग्रंथोत्सवाचे उद्घाटन होणार आहे. ११.३० ते १.३० या दरम्यान 'वाचन संस्कृती व ग्रंथ चळवळ कशी वाढेल?', या विषयावर परिसंवाद होणार आहे तर २.३० ते ३.३० या वेळेत नाट्य व खुली चर्चा रंगणार आहे. मी, फॅमिली, मोबाइल आणि वाचन संस्कृती, या विषयाचा त्यात वेध घेतला जाणार आहे. त्यानंतर ३.३० ते सायंकाळी ६ या वेळेत साहित्यातून उमलले 'स्वरतरंग', हा कार्यक्रम होणार आहे.

ग्रंथोत्सवाचा दुसरा दिवसही भरगच्च कार्यक्रमांचा असणार आहे. सकाळी ९.३० ते १०.३० या वेळेत 'महात्मा गांधी यांचे साहित्य आणि विचार' या विषयावर प्रा. जवाहर मुथा यांचे व्याख्यान होईल. सकाळी १०.३० ते ११ दरम्यान 'मराठी भाषा उपरी होतेय का?' यावर रत्नाकर मतकरी यांच्या संकल्पनेतून परिसंवाद होणार आहे. त्यानंतर ११ ते १२ या वेळेत 'लेखिका आपल्या भेटीला' हा परिसवांद रंगणार आहे. यात सुशिला महाराव, डॉ. लीला गोविलकर, मेघना पेठे, कांचन घाणेकर आणि यशोधरा काटकर यांचा सहभाग असणार आहे. दुपारी १२ ते १.३० दरम्यान 'मराठी साहित्यातील आधुनिकता' या विषयावर रंगणाऱ्या परिसंवादात डॉ. शीतल पावसकर, लता पांचाळ, डॉ. प्रतिभा टेंभे या मतप्रदर्शन करणार आहेत. दुपारी २.३० ते ४ दरम्यान 'भाई एक साहित्यानंद' हा पु. ल. देशपांडे यांच्यावर आधारित कार्यक्रम होईल. यात जयंत देशपांडे आणि महेश मांजरेकर यांचा सहभाग असणार आहे. सायंकाळी ४.१५ ते ५.४५ यादरम्यान 'गझलांजली' हा कार्यक्रम श्रोत्यांना मंत्रमुग्ध करणार आहे. त्यानंतर सायंकाळी ६ वाजता ग्रंथोत्सवाचा सांगता सोहळा होईल, अशी माहिती मुंबई शहर जिल्हा अधिकारी भीमराव जीवणे, दासावाचे कार्याध्यक्ष चंद्रशेखर देशमुख, प्रमुख कार्यवाह दत्ता कामथे यांनी दिली.