पालिका शाळा होणार द्विभाषिक

niraj.pandit@timesgroup.com
@nirajcpanditMT

मुंबई : मुंबई महापालिकेच्या शाळांमधील विद्यार्थी गळती रोखण्यासाठी व विद्यार्थ्यांना दर्जेदार शिक्षण देण्यासाठी आज, शुक्रवारपासून सुरू होणाऱ्या शैक्षणिक वर्षात सर्व पालिका शाळा द्विभाषिक होणार आहेत. या शाळांमध्ये इयत्ता पहिलीत प्रवेश घेणाऱ्या विद्यार्थ्याला इंग्रजी हा विषय प्रथम भाषा म्हणून शिकविला जाणार आहे.

मुंबईत इंग्रजी शाळांची संख्या वाढल्याने पालिका शाळांमधील विद्यार्थीगळती वाढतच आहे. यामुळे अनेक मराठी अनुदानित शाळांनी सेमी इंग्रजीची वाट धरली आणि विद्यार्थ्यांना रोखून धरण्याचा प्रयत्न सुरू केला. यानुसार पालिकेच्या शिक्षण विभागानेही पालिकेच्या सर्व शाळा द्विभाषिक करण्याचा निर्णय घेतला आहे. ही प्रक्रिया टप्याटप्याने पार पडणार असून सुरू होणाऱ्या शैक्षणिक वर्षातील विद्यार्थ्यांना याचा लाभ मिळणार आहे. पालिकेच्या मराठी माध्यमांच्या शाळांसह सर्व भाषांच्या शाळांमध्ये आतापर्यंत इंग्रजीचा अभ्यासक्रम हा तृतीय भाषा म्हणून होता. मात्र या वर्षीपासून इंग्रजी प्रथम भाषा असेल. याशिवाय गणित व विज्ञान इंग्रजीत शिकविण्याचा निर्णय घेतल्याचे शिक्षणाधिकारी महेश पालकर यांनी सांगितले.

टॅबचे वाटप

पालिका शाळांमध्ये शिक्षण घेणाऱ्या विद्यार्थ्यांना देण्यात येणाऱ्या २७ शालोपयोगी वस्तू, पाठ्यपुस्तके, तसेच बससेवेसाठी आवश्यक विशेष पास, तसेच टॅब देण्यात येणार असल्याचेही पालकर यांनी सांगितले. दरम्यान, काही शाळांमध्ये महापौर विश्वनाथ महाडेश्वर, शिक्षण समिती अध्यक्ष मंगेश सातमकर उपस्थित राहून विद्यार्थ्यांचे स्वागत करणार आहेत.