​ नोटाबंदीवर 'क्रेडिट'चा उतारा

'अमर फोटो स्टुडिओ'ला प्रेक्षकांचा प्रतिसाद

म. टा. प्रतिनिधी, मुंबई

नोटबंदीचा अचानक घेतलेला निर्णय आणि त्यामुळे नाटकाचे रद्द होणारे प्रयोग बघता, प्रेक्षकांनी नाटकाकडे वळावे यासाठी निर्मात्यांकडून अनेक प्रयत्न होत आहेत. प्रयोग रद्द झालेल्या नाटकांमध्ये 'अमर फोटो स्टुडिओ’ हे नाटकही होते. नोटाबंदीमुळे बुकिंगवर परिणाम होऊ नये यासाठी 'आज नाटक बघा, उद्या पैसे आणून द्या' अशी जाहिरात या निर्मात्यांकडून करण्यात आली. शनिवारी पुण्यात आणि आज, रविवारी बोरिवलीत असलेल्या प्रयोगांसाठी हा पर्याय वापरून बघण्यात आला. मात्र पुण्यात काही मोजके प्रेक्षक वगळता, अनेकांनी डिजिटल पेमेन्टचा पर्याय वापरून नाटकाचा आनंद घेतला.

शनिवार आणि रविवार हे नाटकासाठी महत्त्वाचे दिवस असतात. या दिवशीच्या तारखा मिळणे देखील निर्मात्याच्या दृष्टीने मोठी गोष्ट असते. अशावेळी पुणे आणि बोरिवलीमध्ये प्रयोग लागलेले असताना, केवळ नोटा नसल्याने प्रेक्षकांनी नाटकाला मुकू नये, अशी नाटकाच्या टीमची इच्छा होती. त्यासाठी ‘आज नाटक बघा आणि उद्या पैसे द्या,’ असे आवाहन निर्मात्यांनी केले. पण पुण्यातले अगदी मोजके प्रेक्षक वगळता सगळ्यांनी वेगवेगळे पर्याय वापरून नाटकाची तिकिटे विकत घेतली. पुण्यात पाचशे तिकिटे विकली गेली, तर बोरिवलीतही नाट्यगृह अर्ध्यापेक्षा जास्त भरले होते. महत्त्वाचे म्हणजे बोरिवलीत एकाही प्रेक्षकावर नाटक ‘फुकट’ बघण्याची वेळ आली नाही. यातून मराठी प्रेक्षकांचे नाटकावरचे प्रेम तर कळून येतेच, पण नोटाबंदीच्या या परिस्थितीवर डेबिट आणि क्रेडिट कार्डचा उताराही मिळाला. शिवाय पुण्याच्या प्रयोगाला पन्नास तर मुंबईच्या प्रयोगाला आठ जणांनी चेक देऊन तिकिटे विकत घेतली.

हीच पद्धत वापरणार

'अमर फोटो स्टुडिओ'सोबतच आता अनेक नाटकांनी डिजिटल पेमेंटची व्यवस्था केली असून यापुढे नाटकाची तिकिटे याच पद्धतीने विकली जातील, असे मत अनेक निर्माते व्यक्त करत आहेत. निर्माते अभिजित साटम यासाठी विशेष मेहनत घेत आहेत.

केवळ नोटा नसल्याने प्रेक्षकांनी नाटकाला मुकावे हे न पटण्याजोगे आहे. प्रेक्षकांवर आमचा विश्वास आहे म्हणून ‘आज नाटक बघा, उद्या पैसे द्या' हा प्रयोग आम्ही करून बघितला. उधारीचे पैसे नाही आले तरी निदान त्यांना नाटक बघितल्याचे समाधान मिळेल. यातून मराठी प्रेक्षकांचे नाटकावर किती प्रेम आहे याचा प्रत्यय आला.

- सुनील बर्वे, निर्माता