महिला डॉक्टरचे करोनानं निधन; 'शेवटचे गुड मॉर्निंग' म्हणत दिले होते मृत्यूचे संकेत

मुंबईः महाराष्ट्रात करोना संसर्गाची दुसरी लाट आली असून राज्यातील परिस्थिती चिंताजनक आहे. अनेक जाणांना करोनामुळं प्राण गमवावे लागले आहेत. तर, कोविड योद्ध्यांनाही आता करोनाचा संसर्ग होण्याचे प्रमाण वाढले आहे. मुंबईत अशीच एक धक्कादायक घटना समोर आली आहे. शिवडीतील एका डॉक्टर महिलेचा करोनामुळं मृत्यू झाला आहे. विशेष म्हणजे या महिलेनं फेसबुक पोस्टच्या माध्यमातून तसे संकेत दिले होते.

शिवडीतील क्षयरोग रुग्णालयातील मुख्य वैद्यकीय अधिकारी डॉ. मनिषा जाधव यांना काही दिवसांपूर्वी करोनानं गाठलं होतं. त्यांना सारखा ताप येत होता. त्यामुळं त्यांना कांदिवलीतील शताब्दी अर्थात डॉ. बाबासाहेब आंबेडकर रुग्णालयात दाखल केलं होतं. तिथं त्यांच्यावर उपचारही सुरु होते. मात्र, उपचारादरम्यान त्यांचे निधन झाले. त्या ५२ वर्षांच्या होत्या. निधनापूर्वी डॉ मनिषा यांनी फेसबुकवर एक भावूक पोस्ट लिहली होती. यात त्यांनी 'कदाचित शेवटचे गुड मॉर्निंग' असंही लिहलं होतं.

मनिषा जाधव यांची फेसबुक पोस्ट

१८ एप्रिल रोजी सकाळी त्यांनी फेसबुक पोस्ट लिहली होती. 'कदाचित अखेरचे गुड मॉर्निंग, मी पुन्हा या व्यासपीठावर भेटू शकणार नाही. सर्वांनी काळजी घ्या. हे शरीर नश्वर आहे, पण आत्मा नाही. आत्मा अमर असतो, असं त्यांनी लिहलं होतं. त्यांच्या या पोस्टमुळं त्यांना आपल्या मृत्यूची चाहूल आधीच लागली होती का,' अशी चर्चा सध्या हेतेय.