मुंबई: सपाच्या माजी नगरसेविकेची आत्महत्या

मुंबई: मुंबई महापालिकेतील समाजवादी पक्षाच्या माजी नगरसेविका नूरजहाँ रफीक शेख (वय ४५) यांनी आत्महत्या केली आहे. गोवंडी, शिवाजी नगर येथील राहत्या घरी रविवारी रात्री गळफास घेऊन त्यांनी जीवन संपवलं. कौटुंबिक वादातून त्यांनी हे पाऊल उचलल्याचं समजतं.

नूरजहाँ यांचा मृतदेह घाटकोपर येथील राजावाडी रुग्णालयात शवविच्छेदनासाठी पाठवण्यात आला आहे. शिवाजीनगर येथील स्मशानभूमीत आज सायंकाळी त्यांचा दफनविधी पार पडणार आहे.

नूरजहाँ या शिवाजी नगर येथील प्रभाग क्र. ३७ मधून दोनवेळा समाजवादी पक्षाच्या तिकिटावर महापालिकेत निवडून गेल्या होत्या. त्यांनी प्रभाग समितीचं अध्यक्षपदही भूषवलं होतं. त्यांच्या कन्या आयेशा शेख या सध्या मुंबई महापालिकेत नगरसेविका असून गोवंडीतूनच निवडून आल्या आहेत.