‘त्या’ कंपनीला ३९ कामे, पण ऑफिस लहानशा फ्लॅटमध्ये!

VijayV.Singh@timesgroup.com

मुंबई : सीएसएमटी येथील हिमालय पादचारी पुलाच्या जीवघेण्या दुर्घटनेप्रकरणी ज्या डी. डी. देसाई असोसिएटेड कन्सल्टंट्स अँड अॅनलिस्ट्स कंपनीवर मुंबई महापालिकेने प्राथमिक चौकशीअंती ठपका ठेवला आहे, त्या कंपनीचे कार्यालय हे कंपनी संचालकांचे निवासस्थान असलेल्या लहानशा फ्लॅटमध्येच असल्याची धक्कादायक बाब समोर आली आहे. विशेष म्हणजे या कंपनीला पालिकेने वर्दळीच्या ठिकाणच्या अन्य ३८ पुलांच्या तपासणीचीही जबाबदारी दिली होती.

या कंपनीला पालिकेने २०१६मध्ये ३९ पुलांच्या ऑडिट कामासाठी ६३ लाख १८ हजार रुपयांचे कंत्राट दिले होते. या कंपनीने हिमालय पुलासह अन्य ११ पूल हे वापरण्यायोग्य सुस्थितीत असल्याचा अहवाल दिला होता. त्याचबरोबर प्रिन्सेस स्ट्रीट रेल्वे ओलांडणी पुलासह नऊ पुलांविषयी मोठ्या दुरुस्तीची, १५ पुलांविषयी किरकोळ दुरुस्तीची, तर तीन पुलांच्या तोडकामाची शिफारस केली होती.

सन २००३मध्ये सुरू झालेल्या या कंपनीचे नीरज देसाई, हेमलता देसाई व नीरजचे वडील दिलीपकुमार दह्याभाई देसाई हे तीन संचालक आहेत. मात्र, ही कंपनी अंधेरी पश्चिमेकडील एका तीन मजली इमारतीतील लहानशा फ्लॅटमधून चालत असल्याची धक्कादायक बाब 'टाइम्स ऑफ इंडिया'ने शुक्रवारी केलेल्या तपासणीत उघडकीस आले. याठिकाणी जाऊन पाहणी केली असता, एका महिलेने फ्लॅटचा दरवाजा उघडला. त्यांच्याकडे नीरज देसाईंविषयी विचारणा केली असता, 'ते सकाळपासूनच महापालिकेच्या मुख्यालयात आहेत', असे उत्तर त्यांनी दिले. कंपनीच्या नोंदणीकृत पत्त्याविषयी त्यांच्याकडे विचारणा केली असता त्यांनी काहीही सांगण्यास नकार दिला. मात्र, त्याचवेळी आमच्या कंपनीच्या नावे जवळच एक कार्यालय असले तरी आम्ही घरूनच काम करणे पसंत करतो, अशी पुस्तीही त्यांनी जोडली. सरकारी नोंदीनुसार, या कंपनीचे नोंदणीकृत कार्यालय अंधेरी पश्चिम येथील जी. डी. पाटील इमारतीत आहे.

नगरसेवकांनीही केले प्रश्न उपस्थित

देसाई असोसिएटेड कंपनी ही फारशी प्रसिद्ध नसतानाही तिच्याकडे 'ऑडिट'चे काम सोपवल्याबद्दल पालिका वर्तुळात आश्चर्य व्यक्त केले जात आहे. अनुभव न तपासताच या कंपनीची निवड केल्याबद्दल अनेक ज्येष्ठ नगरसेवकांनी प्रश्न उपस्थित केले आहेत. 'देसाई असोसिएटेड कंपनीने हिमालय पूल सुस्थितीत असल्याचा अहवाल दिला आणि पालिका प्रशासनानेही खातरजमा न करता तसाच स्वीकारला, हे आश्चर्यजनक आहे. याबद्दल वरिष्ठ अधिकाऱ्यांसह सर्व संबंधितांना जबाबदार धरायला हवे', असे मत पालिकेतील विरोधी पक्षनेते व काँग्रेस नगरसेवक रवी राजा यांनी व्यक्त केले.