GSB Ganpati: जीएसबी गणपतीसाठी सरकारनं 'ही' अट शिथिल करावी, मंडळाची विनंती

मुंबई: लालबाग सार्वजनिक गणेशोत्सव मंडळाने (Lalbaugcha Raja) यंदा गणेशाची प्रतिष्ठापना न करण्याचा निर्णय घेतला असला तरी मुंबईतील प्रसिद्ध जीएसबी सेवा मंडळ गणेशोत्सव साजरा करणार आहे. 'करोनाच्या पार्श्वभूमीवर सरकारच्या सर्व सूचनांचे काटेकोर पालन करून साधेपणानं हा उत्सव साजरा केला जाईल. मात्र, जीएसबीच्या गणेशमूर्तीला चार फूट उंचीचे बंधन घालू नये,' अशी विनंती मंडळानं राज्य सरकारकडं केली आहे. (GSB Ganpati Mandal requests to State Government)

वाचा: नातीनं आजीचं नाक कापलं; परेश रावल यांची प्रियांकांवर जहरी टीका

जीएसबी सेवा मंडळानं तसं निवेदन काढलं आहे. वडाळ्यातील जीएसबी मंडळाचा गणेशोत्सव हा मुंबईतील एक प्रमुख उत्सव असतो. राज्यभरातून भाविक या उत्सवात सहभागी होत असतात. यंदा २२ ऑगस्ट ते २६ ऑगस्टपर्यंत उत्सव साजरा करण्याचा निर्णय मंडळानं घेतला आहे. सामाजिक अंतर, मुखवटे परिधान करणे, स्वच्छता व इतर निकषांचे पालन करून हा उत्सव साजरा केला जाणार आहे. भाविकांना मंडपाच्या आत प्रवेश दिला जाणार नाही. भाविकांसाठी ऑनलाइन दर्शनाची सोय केली जाणार आहे. तर, सेवेदारांना ई-कॉमर्स प्लॅटफॉर्म द्वारे घरपोच प्रसाद वाटप करण्याचा निर्णय मंडळानं घेतला आहे. महागणपतींच्या आगमनामुळे कोविड-१९ च्या साथीचे संकट दूर होईल; कारण तोच सर्व अडथळ्यांचा नाश करणारा आहे,' असा विश्वासही मंडळानं व्यक्त केला आहे.

Live: राज्यातील करोनामुक्त रुग्णांची संख्या १ लाख पार

उंचीचे बंधन का नको?

जीएसबीचा महागणपती हा शाडूच्या मातीचा असतो. पर्यावरणस्नेही (इको फ्रेंडली) अशी ही मूर्ती गेल्या ६५ वर्षांपासून मंडपातच साकारली जाते. मंडपातच कृत्रिम तलाव बनवून तिथंच तिचं विसर्जन केलं जातं. विसर्जन मिरवणूक काढली जात नाही. त्यामुळं जीएसबी महागणपतीच्या मूर्तीवर उंचीचं बंधन असू नये, असं मंडळाचं म्हणणं आहे. राज्य सरकार जीएसबी मंडळाची ही विनंती मान्य करते का, हे पाहावं लागणार आहे.

वाचा: हे चित्र देशाच्या इभ्रतीला डाग लावणारे आहे?; शिवसेनेचा हल्लाबोल

मुंबईसह महाराष्ट्रातील सर्वच मंडळांनी सरकारच्या आवाहनाला प्रतिसाद देऊन गणेशाची मूर्ती चार फुटांपर्यत मर्यादित ठेवण्याचा निर्णय घेतला आहे. गणेश गल्लीतील 'मुंबईचा राजा' मंडळानं यंदा उत्सवमूर्ती न बसवता केवळ पूजेच्या मूर्तीची प्रतिष्ठापना करण्याचा निर्णय घेतला आहे. तर, अन्य मंडळांनीही सरकारच्या सूचनेनुसार निर्णय घेतले आहेत. विसर्जन व आगमन सोहळे रद्द करण्यात आले आहेत. 'चिंचपोकळीचा चिंतामणी' मंडळानं पाटपूजन सोहळाही रद्द केला आहे.