यंदा बैलगाडी स्पर्धा नाही

मटा ऑनलाइन वृत्त । मुंबई

राज्यात बैलगाडी स्पर्धेसाठी परवानगी देण्यास उच्च न्यायालयाने मनाई केली आहे. त्यामुळे यंदा राज्यात बैलगाडी स्पर्धा रंगण्याची शक्यता कमी आहे.

बैलगाडी स्पर्धां व्हाव्यात म्हणून राज्य सरकारनं यासंदर्भात अधिसूचना काढली असली तरी जोपर्यंत बैलगाडी स्पर्धांदरम्यान बैलांना इजा होणार नाही याविषयी सरकार नियमावली बनवत नाहीत आणि ही नियमावली आमच्यासमोर सादर करत नाही, तोपर्यंत आम्ही बैलगाडी स्पर्धांना परवानगी देणार नाही.’ असं न्यायालयानं स्पष्ट केलं. तसंच बैलगाडी स्पर्धांबाबत येत्या २ आठवड्यांत भूमिका स्पष्ट करा, असे आदेशही न्यायालयाने राज्यसरकारला दिले आहेत.

अजय मराठे यांनी राज्य सरकारने बैलगाडी स्पर्धांसाठी काढलेल्या अधिसूचनेला आव्हान देणारी याचिका उच्च न्यायालयात दाखल केली आहे. त्यावर सुनावणी करताना न्यायालयाने ही परवानगी नाकारली. बैलगाडी स्पर्धा हा क्रूर खेळ असून यामध्ये बैलांना इजा होत असल्याचं याचिकाकर्त्यांचं म्हणणं आहे. ‘बैल हा धावण्या करता नाही तर कष्टाची कामं करण्यासाठीचा प्राणी आहे.’ असंही याचिकाकर्त्यांनी आपल्या याचिकेत म्हटलं आहे. शिवाय न्यायालयाने या स्पर्धेला बंदी घातल्यानंतर त्याला राज्यसरकारनं आव्हान दिलं नव्हतं. त्यामुळे राज्यसरकार बंदीच्या बाजूनं असल्याचा दावा याचिकाकर्त्याने याचिकेत केला आहे. शिवाय सर्वोच्च न्यायालयाने बैलगाडी स्पर्धा हा महाराष्ट्राचा पारंपारिक खेळ नसल्याचं निर्वाळा दिला होता, त्याचा हवालाही या याचिकेत देण्यात आला आहे.