अ‍ॅपशहर

स्वप्नील मृत्यूप्रकरणी पोलिसांवर ताशेरे

‘नवी मुंबईच्या नेरूळमध्ये स्वप्नील सोनावणे या मुलाचा मृत्यू हा ‘ऑनर किलिंग’चे धडधडीत उदाहरण आहे. या प्रकरणात नेरूळ पोलिसांनी अत्यंत असंवेदनशीलता दाखवली. त्यांनी योग्यवेळी योग्य पावले उचलली असती तर स्वप्नीलचा जीव वाचू शकला असता. मात्र, पोलिस बॉलीवूडमधल्या पोलिसांप्रमाणे वागत राहिले आणि मुलामुलीला चित्रपटांतली उदाहरणे सांगत राहिले’, अशा कठोर शब्दांत उच्च न्यायालयाने पोलिसांच्या असंवेदनशीलतेवर कोरडे ओढले आहेत.

Maharashtra Times 13 Jan 2017, 4:09 am
ramesh.khokrale@timesgroup.com
महाराष्ट्र टाइम्स.कॉम mumbai high court passes strictuers on nerul police
स्वप्नील मृत्यूप्रकरणी पोलिसांवर ताशेरे


Tweet : @rameshkMT

मुंबई ः ‘नवी मुंबईच्या नेरूळमध्ये स्वप्नील सोनावणे या मुलाचा मृत्यू हा ‘ऑनर किलिंग’चे धडधडीत उदाहरण आहे. या प्रकरणात नेरूळ पोलिसांनी अत्यंत असंवेदनशीलता दाखवली. त्यांनी योग्यवेळी योग्य पावले उचलली असती तर स्वप्नीलचा जीव वाचू शकला असता. मात्र, पोलिस बॉलीवूडमधल्या पोलिसांप्रमाणे वागत राहिले आणि मुलामुलीला चित्रपटांतली उदाहरणे सांगत राहिले’, अशा कठोर शब्दांत उच्च न्यायालयाने पोलिसांच्या असंवेदनशीलतेवर कोरडे ओढले आहेत.

उच्च जातीतील मुलीशी प्रेम केले, या कारणामुळे स्वप्नीलवर मुलीच्या कुटुंबीयांनी १९ जुलै २०१६च्या रात्री जीवघेणा हल्ला केला आणि त्यात त्याचा मृत्यू झाला, असा आरोप आहे. या गुन्ह्यात आरोपी असलेला मुलीचा चुलतभाऊ दुर्गेश पाटील याचा जामीन अर्ज फेटाळून लावताना न्या. साधना जाधव यांनी हे गंभीर निरीक्षण नोंदवले.

पोलिसांना संवेदनशील करण्याची गरज

‘ऑनर किलिंग’ हे समाजातील रानटी स्वरूपाचे प्रतिबिंब आहे. सुसंस्कृत समाजात त्याला स्थान असू शकत नाही. केवळ प्रेम केले म्हणून त्या १५ वर्षीय मुलाला अत्यंत ‌‌निर्घृणपणे ठार मारण्यात आले. हे असे प्रकार आपल्या समाजात सहन करता कामा नयेत. अशा प्रकरणांबाबत पोलिस विभागाला संवेदनशील करण्याची आवश्यकता आहे, असे गंभीर निरीक्षण न्यायालयाने स्वप्नील सोनावणे मृत्यूप्रकरणी नोंदवले.

पोलिस हे लोकांचे सेवक आहेत. त्यांचे कर्तव्य हे नागरिकांचे रक्षण करण्याचे आहे, समाजविघातक घटकांशी हातमिळवणी करण्याचे नव्हे, याची जाणीवही पोलिसांना सातत्याने करून द्यायला हवी, याकडेही न्यायमूर्तींनी आदेशात लक्ष वेधले आहे.

सर्व आरोपी जबाबदार

स्वप्नीलच्या दुर्दैवी मृत्यूला सर्व आरोपी जबाबदार आहेत आणि स्वप्नीलला संपवण्यासाठी कट रचताना दुर्गेश पाटील यानेही सक्रिय सहभाग घेतल्याचे स्पष्ट दिसत आहे. त्यामुळे त्याला कोणतीही दयामाया दाखवता येणार नाही, असे निरीक्षण नोंदवत न्या. साधना जाधव यांनी दुर्गेशचा जामीन अर्ज फेटाळून लावला. गुन्हा घडला आहे तो सागर, त्याचा भाऊ व वडिलांकडून घडला आहे, हा दुर्गेशचा युक्तिवाद न्यायालयाने फेटाळला.

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज