मुंबई: राणीच्या बागेतील पेंग्विनचा मृत्यू

म. टा. प्रतिनिधी । मुंबई

मुंबईतील राणीच्या बागेतील (वीरमाता जिजाबाई भोसले उद्यान) आठपैकी एका पेंग्विनचा यकृतातील संसर्गानं आज सकाळी मृत्यू झाला. जुलैमध्ये दक्षिण कोरिया येथून ८ पेंग्विन राणीच्या बागेत आणण्यात आले होते. त्यांना राणीच्या बागेत विशेष निगराणीखाली ठेवण्यात आलं होतं.

महापालिकेनं सेऊलमधील कोएक्स एक्चेरिअममधून ३ नर आणि ५ मादी जातीचे असे आठ हम्बोल्ट पेंग्विन आणले होते. त्यांना राणीच्या बागेतील सोइसुविधांयुक्त क्वारंटाइन क्षेत्रात ठेवलं होतं. १८ ऑक्टोबरला सकाळी साडेआठच्या सुमारास त्यातील एका पेंग्विनला (मादी) श्वसनाचा त्रास जाणवू लागला. ती सुस्त पडली होती. पशुवैद्यकीय अधिकाऱ्यांनी काही चाचण्या केल्या. त्यात कल्चर सेन्सिटिव्हीटी चाचणीही करण्यात आली आहे. त्यात जिवाणूचा (एन्रोफलॉक्सेसिन) संसर्ग झाल्याचे निष्पन्न झाले. त्यानंतर पेंग्विन पक्ष्यांच्या आरोग्य आणि देखभालीचा अनुभव असलेल्या विदेशी पक्षीतज्ज्ञांच्या सल्ल्यानुसार तिच्यावर उपचार सुरू करण्यात आले. मात्र, प्रकृतीत कोणतीही सुधारणा दिसून आली नाही. गेल्या पाच दिवसांपासून तिच्यावर उपचार सुरू होते. मात्र, उपचाराला प्रतिसाद दिला नाही. अखेर आज सकाळी सव्वाआठ वाजता पेंग्विनचा मृत्यू झाला. दरम्यान, मृत्युमागील नेमके कारण शोधण्यासाठी परळ येथील पशुवैद्यकीय महाविद्यालयातील पॅथोलॉजी विभागातील प्राध्यापकांनी शवविच्छेदन केलं. त्यानंतरच तिच्या मृत्यूचे निश्चित कारण समजू शकेल, असं सांगण्यात आलं. दरम्यान, इतर सात पेंग्विन निरोगी असून, त्यांना निरीक्षणाखाली ठेवण्यात आलं आहे, असं महापालिकेकडून सांगण्यात आलं.